Avqust ayında təqdim edilən yeni flaqman telefonları ilə Samsung-un növbəti diqqət mərkəzində digər sərfəli smartfon modeli olacaq. Belə ki, söhbət Galaxy A05 modelinin bir üst seqmentdə təmsilçisi olacaq, detalları OnLeaks ləqəbi ilə məşhur insayder tərəfindən sızdırılan Galaxy A15 modelindən gedir.
Beləliklə, bu il Samsung-un ən çox satılan giriş seqment seriyasının davamçısı olacaq Galaxy A15-in eksklüziv renderləri bizə modelin dizaynının Samsung Galaxy smartfonlarında gördüyümüzdən bir qədər fərqli olduğunu göstərir. Diqqət edəcəyiniz ilk detal, Galaxy A15-in Samsung-un ümumiyyətlə istifadə etdiyi yuvarlaq çərçivənin əvəzinə düz çərçivəyə sahib olmasıdır. Bu da bizə böyük bir ehtimalla hazırlıq mərhələsində olan Galaxy A35 və Galaxy A55 üçün öncədən xəbərdarlıq ola bilər.
Əksər hallarda Galaxy A seriyasında radikal dizayn dəyişikliyyi növbəti mərhələlərdə Galaxy seriyasının daha üst modellərindən cüzi dəyişikliklər edilərək təkrarlanır. Kəskin kənarlı çərçivələrin ilk növbədə hansı modellərdə təkrarlanacağı dəqiq deyil. Lakin elə Galaxy S24 Ultra modelində qıvrımlı ekrandan düz ekran panelinə keçid ediləcəyi uzun müddətdir məlum olub.
Özlüyündə sızdırılmış bu model ön tərəfdən o qədər də möhtəşəm görünməyəcək. Qalın ekran çərçivələrini və infinity-u konseptini qoruyan şirkət Galaxy A15 modelini hələ də giriş seqmenti model kimi hiss etdirəcək. Cihazın 6.4 düymlük ekran paneli alacağı güman edilir. Texniki xüsusiyyətlər isə, hələlik açıqlanmayıb. Smartfonun təqdimatı isə 2024-cü ilin fevral ayında baş tutacaq.
