Apple brendi hazırda ən çox gəlir əldə edən və ən çox smartfon satan brend olsa da, məhsulları rəqiblərinə nəzərən çox bahadır. Təbii ki, bu qiymət qarşısında texnologiya nəhəngi müştərilərinə yüksək performanslı çipset və yüksək keyfiyyətli kamera sensorları da təklif edir. Lakin yenə də iPhone, iMac və MacBook modellərinin çox baha qiymətə təklif olunduğu danılmazdır. Hətta Apple özü belə bunun fərqindədir. Amerikalı texnologiya nəhəngi olan Apple gələn il münasib qiymətə MacBook təqdim etməyi planlaşdırır. Belə ki, Apple bu addımı Chromebook modelləri ilə rəqabət aparmaq üçün atacaq.
Görünən odur ki, Microsoft kimi Apple brendi də təhsil üçün əlverişli noutbuk bazarında böyüməyi hədəfləyir. Belə ki, etibarlı mənbələr amerikalı brendin Chromebook-larla rəqabət aparmaq üçün daha əlverişli MacBook seriyası təqdim etməyi planlaşdırdığını bildirir. Beləliklə Apple gələn il daha münasib qiymətə MacBook modelləri təqdim edəcək. Təbii ki, yeni seriyanın hazırda bazarda mövcud olan MacBook Air və MacBook Pro modellərindən bəzi əsas fərqləri olacaq. Bunlardan ən birincisi korpusla bağlıdır. Apple yeni MacBook seriyasında daha fərqli materiallardan istifadə edəcək. Bundan əlavə, şirkət xərcləri azaltmaq üçün bəzi komponentlərini daha əlverişli variantlarla əvəz edə bilər.
Əlavə olaraq Apple brendi təhsil üçün nəzərdə tutulan yeni MacBook modellərini M1 çipi ilə təchiz edə bilər. M1 çipi hazırda bir çox prosessordan daha performanslıdır və daha ucuz qiymətə təklif olunur. Həmçinin yeni cihaz 8-128Gb yaddaş seçimləri ilə qarşımıza çıxa bilər. Apple isə hələlik bu iddialar rəsmi cavab verməyib.
