Dünyanın ən böyük avtomobil şirkətlərindən biri olan Volkswagen nəhayət yeni ID.4 elektromobilini təqdim edib. Beləliklə yeni elektromobil daha çox performans və mənzil ilə elektromobil həvəskarlarının qarşısındadır. Tək elektrik mühərriki ilə təchiz edilən elektromobil indi 81 at gücü daha çox gücə malikdir. Bundan əlavə daha asan məlumat-əyləncə sistemi və daha bir çox yeniliklər təklif olunur. Yeni ID.4 modeli ənənəvi dizaynına sadiq qalıb.
Qeyd etdiyimiz kimi, eksteryer tərəfində elektromobil elə də çox dəyişilməyib. Üfüqi fara dizaynları və ənənəvi dizayn xətti yeni avtomobildə də davam edib. Yeni Volkswagen ID.4 modeli əsasən texniki cəhətdən inkişaf edib. Maraqlısı budur ki, tək mühərrikli 2024 model ID.4, demək olar ki, keçən ilki iki mühərrikli variant qədər güclüdür. Belə ki, hazırda 82 kVt/saat batareyaya malik tək mühərrikli versiya 201 at gücü təklif etsə də, bu göstərici yeni tək mühərrikli elektromobildə 282 at gücünə qədər artıb. Onu da qeyd edək ki, hazırda cüt mühərrikli ID.4 modelləri 295 at gücü hasil edir. Yeni iki mühərrikli versiyada isə bu göstərici 330 at gücünə yüksəlib.
Bundan əlavə yeni elektromobilin mənzili də artıb. Hazırkı model 442 km mənzil vəd edir. Lakin yeni modelin mənzili bundan dəfələrlə çox olacaq. Təəssüf ki, Volkswagen mənzilin artdığını bildirsə də, dəqiq göstərici vermir. Həmçinin yeni model daha kiçik batareyalı versiyasında 12 düymlük, daha böyükdə isə 12.9 düymlük ekran panelləri ilə təchiz ediləcək. Hələlik yeni modellərin qiyməti və nə zaman satışa çıxarılacağı barədə məlumat yoxdur.
