Apple-ın daxili tərtibatçı koduna əsaslandığı iddia edilən yeni hesabata görə, şirkət ağıllı saatlarına Touch ID (barmaq izi oxuyucusu) gətirmək üzərində işləyir. Bu funksiyanın gələn ilin əvvəlində, daha doğrusu Apple Watch Ultra 4 ilə əlçatan olacağı gözlənilir. Sözügedən kod konkret olaraq şirkətin Touch ID üçün uzun müddətdir mövcud olan daxili kod adı olan “AppleMesa”ya istinad edir. Kodun yalnız daxili istifadə üçün hazırlanması, funksiyanın hələ də konsept mərhələsində olduğunu göstərir. Buna görə də, bu il təqdim edilən modellərdə Touch ID olmayacaq.
Ümumiyyətlə, ağıllı saatlar olduqca kiçik olduğundan, Touch ID sensorunun yerləşdirilməsi problem yaradır. Ola bilsin ki, Apple iPad Air seriyasında olduğu kimi sensoru bir düyməyə birləşdirəcək. O, həmçinin Android telefonlarında olduğu kimi ekranın altına inteqrasiya oluna bilər. Ümumiyyətlə, Apple hər il Apple Watch modellərinə əlavə yeniliklər etməklə diqqət cəlb etməyi sevir, daha əvvəl cihazın xarici dizaynında dəyişikliklər edən Apple artıq daxili tərəfdə də ciddi yeniliklər etmək fikrinə düşüb.
Keçən həftə ortaya çıxan başqa bir şayiə, Apple Saatlarının gələn il böyük dizayn dəyişikliyinə məruz qalacağını irəli sürdü. Touch ID-nin bu dəyişikliyə daxil olması tamamilə mümkün görünür. 2026 modellərinin də yeni prosessorla gəlməsi gözlənilir. Bununla belə, Touch ID-nin Apple Watch modellərinə həqiqətən də əlavə olunub-olunmayacağını sadəcə növbəti illərdə dəqiq öyrənmək mümkün olacaq.
