Səs sistemi və dinamik bazarının ən böyük adları McIntosh və Sonus Faber CES 2024 sərgisində 1 milyon dollarlıq səs sistemi təqdim edib. Uzun müddətdir ki, dünyanın ən yaxşı səs sistemlərini və dinamiklərini istehsal edən şirkətlərdən ikisi McIntosh və Sonus Faber indi bütün diqqətləri öz üzərinə cəlb ediblər. Belə ki, hər iki şirkət indi dünyanın ən müasir və ən yaxşı səs texnologiyalarına malik səs sistemi üçün bir araya gələrək eyni zamanda dünyanın ən bahalı səs sistemini də təqdim ediblər deyə bilərik.
Qeyd edək ki, McIntosh Group-un bir hissəsi olan şirkətlərdən McIntosh bu il 75 illiyini, Sonus Faber isə 40 illik yubileyini qeyd edir. Bu səbəbdən şirkətlər CES 2024-ü əyləncə məkanına çevirməyə qərar verdilər. Məhz bu məqsədlə də 2000 vattlıq MC2.1KW Monoblok səs sistemi ilə sərgidə iştirak etdilər. Bundan əlavə, şirkətin indiyə qədər istehsal etdiyi ən məşhur avadanlıqlardan bəziləri 75-ci illik yubiley üçün xüsusi olaraq hazırlanmış versiyalarla sərgidə öz yerini aldı.
1 milyon dollarlıq səs sistemi daxilində yer alan MC2.1KW Monoblokun qiyməti 50 min dollardır və üst-üstə qoyulmuş üç monitora sahibdir. Bu modullardan biri çıxış modulu kimi istifadə edilərkən, digər iki monitor gücə nəzarəti təmin edir və hər birinin gücü 1000 vattdır. Açıqlamaya görə bu səs sistemi böyük otaqlarda istifadə və ya yüksək səsli dinamik həvəskarları üçün idealdır. Qeyd edək ki, bu səs sistemi Sonus Faber-in əvvəllər məşhur olan Guarneri və Stradavari modelinin izlərini daşıyır.
