Xiaomi, Apple-dan ilhamlanaraq proqram adlandırma strategiyasına yenidən baxa bilər. Şirkətin HyperOS 3 adını ataraq HyperOS 26-ya keçməyi planlaşdırdığı bildirilir. XiaomiTime-dən verilən bu hesabat Xiaomi-nin Apple-ın liderliyini izləməyi planlaşdırdığını iddia edir. Keçən həftədən Apple-ın iOS 19 yerinə iOS 26-ya keçəcəyi məlum olmuşdu. Ötən gün isə artıq Apple yeni ad ilə iOS sistemini təqdim edib.
Fərqli cihazları üçün fərqli nömrəli əməliyyat sistemlərinə sahib olan Apple, bir-birinə uyğun gəlməyən və çaşqınlıq doğuran nömrələmə sistemindən əl çəkərək ildən-ilə adlandırmağa başlayıb. Xiaomi-nin də oxşar səbəbdən bu yolu tutacağı bildirilir. Ancaq bu mərhələdə bu məlumatı təsdiqləyən kifayət qədər dəlil yoxdur. XiaomiTime iddia edir ki, bu ad dəyişikliyi şirkətin “ən yaxşı bazar strategiyalarına” uyğunlaşmaq üçün atacağı addımların bir hissəsidir. Məqsəd, istifadəçilərin ən son versiyanı daha asan tanıması üçün daha sadə və daha başa düşülən adlandırma sisteminə keçmək kimi görünür. Hələlik HyperOS 3 hazırkı quruluş olaraq qalır və versiya nömrəsinə hər hansı dəyişiklik, çox güman ki, Android 16-nın buraxılışına yaxın baş verəcək.
Əlavə olaraq qeyd edək ki, Apple artıq ötən gecə elan etdiyi iOS 26 ilə bir çox yeniliyə imza atıb. Belə ki, Liquid Glass dizaynına keçid edən Apple böyük mübahisələrə səbəb olacaq yeniliklər edərək, əslində öz dizaynına sadiq qalmayaraq Android smartfonlara bənzər dizayna keçid edib. Bəzi istifadəçilər bunu yenilikçi hesab etsə də, bəziləri də bunu Xiaomi HyperOS oxşarlığı ilə qınayıb. İndi isə Xiaomi HyperOS 26 ilə hansı yenilik edəcəyi böyük maraq doğurur.
