Yeni xəbərlərə görə dünyada milyonlarla istifadəçiyə ev sahibliyi edən Youtube platforması tezliklə “kabel televiziyası” kanallarını pulsuz yayımlamağa başlaya bilər. Yəni, Televiziya provayderləri YouTube ilə əvəz ediləcək. Xatırladaq ki, YouTube daha əvvəl Youtube TV adı altında oxşar bir sistemə də imza atmışdı. Lakin təəssüf ki, bu xidmət ölkəmizdə mövcud deyil. Bu günlərdə ortaya çıxan məlumata görə isə, Youtube eynilə Youtube TV kimi, lakin tamamilə pulsuz – ödənişli kanalları belə pulsuz izləyə biləcəyimiz özünün TV xidmətini hazırlayır. Platforma bu planını reallaşdırmaq üçün artıq bir çox şirkətlə danışıqlara başlayıb.
Pulsuz YouTube TV sınaqlarına başlanıldı
Bilməyənlər üçün Youtube TV hazırda Fox, RSPN, CNN, NFL TV və CBS kimi kanallara dəstək təklif edir. Yeni platformada nümayiş olunacaq kanalların sayı isə əhəmiyyətli dərəcədə artacaq. Bu çərçivədə şirkətin müxtəlif serialları, filmləri və mümkün olan bütün telekanalları platformasına gətirmək üçün danışıqlara başladığı bildirilir. Bu şirkətlər arasında Marvel, Disney, MGM, History Channel, Crime + Investigation və Lionsgate kimi kanalların sahibi olan A+E Networks-in televiziya yayım hüququna sahib olan FimRise var. Əlbəttə ki, siyahı bunlarla yekunlaşmayacaq. YouTube bu planında daha çox şirkət və firmalarda əməkdaşlıq edəcəyini açıqlayıb.
Bundan əlavə, Youtube yeni xidmətin artıq bəzi istifadəçilər tərəfindən sınaqdan keçirildiyini bildirib. Ancaq yeni TV platforması çərçivəsində istifadəçilər televiziya kanallarında olduğu kimi reklamlarla da qarşılaşacaqlar. Göründüyü kimi, YouTube həm Netflix, Amazon Prime və Disney+ kimi rəqəmsal məzmun platformalarına, həm də ənənəvi televiziya kanallarına iddialı rəqib olmağı planlaşdırır. Yeni xidmətin ölkəmizdə olub-olmayacağı hələ ki, naməlumdur. Təsəvvür edin ki, xidmət ölkəmizdə mövcud olarsa və YouTube televiziya kanallarını ödənişli belə olsa özünə inteqrasiya etsə həqiqətən televiziya provayderləri ilə maraqlı rəqabət yarana bilər. Lakin YouTube Premium, YouTube Music kimi xidmətlərin hələ mövcud olmadığını nəzərə alsaq yaxın illərdə belə bir şeyin Azərbaycanda olması inandırıcı görünmür.
