Samsung illərdir üzərində işlədiyi Bixby üçün böyük bir yeniləmə planlaşdırır. Belə ki, Cənubi Koreya nəhəngi bu gün etdiyi açıqlama ilə tətbiqin süni intellekt imkanlarını vurğulayan yeni bir video paylaşıb. Videoda isə birbaşa Bixby-dən bəhs edilməsə də, onun Siri ilə oxşar funksiyası olduğu görünür. Yekun olaraq isə Samsung yeni nəsil Bixby AI-ı dolayı yolla təsdiqləyib deyə bilərik, çünki, Siri ilə oxşarlığı məhz buna işarə edir.
Qeyd edək ki, Bixby-nin AI inteqrasiyası ilk dəfə Çində Galaxy W25 seriyası ilə təqdim edilib. İndi isə bu köməkçinin yanvarın 22-də planlaşdırılan Galaxy Unpacked tədbirində qlobal bazara təqdim ediləcəyi iddia edilir. Buna görə də onu dəstəkləyən ilk smartfonlar Galaxy S25, S25+ və S25 Ultra modellərindən ibarət Galaxy S25 seriyası olacaq. Bu yaxınlarda Samsung tərəfindən yayımlanan 17 saniyəlik video yeni nəsil Bixby-nin xüsusiyyətləri haqqında bəzi məlumatlar da verir. “Əsl süni intellektlə səyahət yoldaşı gəlir” başlıqlı videoda bir qadın cihazına bu əmri verir: “Çöldə oturacaqları olan və pişiklər üçün uyğun İtalyan restoranı tap”. Daha sonra isə məlumatı dostuna göndərməsini və təqviminə əlavə etməsini xahiş edir.
Samsung videoda Bixby-nin adını çəkməyib və birbaşa açıqlama verməyib. Bununla belə, video təbii dil əmrlərini başa düşmək və eyni vaxtda bir neçə işi yerinə yetirmək kimi tətbiqin bəzi imkanlarını təsdiqləyir. Eyni zamanda, yeni şəkillər üçüncü tərəf proqramlarının daha yaxşı inteqrasiyasına da işarə edə bilər. Məsələn, o, restoran rezervasiyası edib, onu təqvimdə saxlaya bilər. Samsung daha əvvəl Çində təqdim etdiyi süni intellektlə işləyən Bixby-nin əmrlərin arxasındakı konteksti daha yaxşı başa düşdüyünü elan etmişdi. O, həmçinin müvafiq məlumatları paylaşmaq üçün internetdən mətn və videolarla cavab verə bilər. Bundan əlavə, o, veb səhifələri tərcümə edə və yaradılmış məzmunu Word və PPT kimi Microsoft Office formatlarında saxlaya bilər. Yenilənmiş Bixby istifadəçi interfeysində də dəyişiklikləri ehtiva edir.
