Opera həmişə olduğu kimi, bu dəfə də yenilikçi funksiya ilə qarşımızdadır. Belə ki, Opera GX adlı oyun brauzeri istifadəçilərə Sevgililər Günü məzmunlarını məhdudlaşdıran yeni HeartBlocker əlavəsini təklif edir. Beləliklə Sevgililər Gününə nifrət edənlər rahat və dinc şəkildə brauzerdən istifadə edə biləcəklər. Yeni HeartBlocker adlı plugin Sevgililər Günü ilə əlaqəli bütün məzmunları, eləcə də sözləri və şəkilləri süzgəcdən keçirməklə onların istifdaçilərin qarşısına çıxmasına maneə olur.
Opera GX brauzerində Sevgililər Günü məzmunlarını məhdudlaşdırmağa imkan verən yeni HeartBlocker adlı plugin 2 versiyaya malikdir. Onlardan biri Normal Mode, digəri isə Emo Mode adlanır. Opera yeni plugini təqdim edərkən bildirib ki, “Sevgililər Gününün həddən artıq kommersiyalaşdırılmış lazımsız festival olduğunu düşünürsünüz? Ürəyiniz yenidən qırıldı? Həmişə olduğu kimi, oyunçular üçün Opera GX brauzeri arxanızdadır”.
Operanın məhsul direktoru Maciej Kocemba bildirir ki,“Sevgi xüsusilə 14 fevralda həssas mövzu ola bilər. Ancaq HeartBlocker ilə siz indi özünüzü bütün romantik şeylərdən qoruya və diqqətinizi həqiqətən vacib olana yönəldə bilərsiniz”. Ümumiyyətlə Opera GX 2019-cu ildə RGB işıqlandırması, RAM sayğacları və daha çoxu ilə oyunçu dostu brauzer kimi buraxılmışdı. Zaman keçdikcə isə Opera GX, Discord və daha çox proqram üçün dəstək əlavə etdi və Gamerlərin sevimlisinə çevrildi. Daha əvvəl də Opera istifadəçilərə yeniliklər təqdim etmişdi. Məsələn, Opera istifadəçilərin öldükdən sonra brauzer tarixçəsini dəyişdirməyi və onları yaxşı bir insan kimi göstərməyi təklif edir. Bununla belə, Opera hələ də Chrome və Bing kimi rəqiblərindən geridədir.
