Nvidia, masaüstü xarici qrafik kartı bazarının son dövrlərdə geriləməsinə baxmayaraq, ilin ilk rübündə satışlarını artıraraq 88% bazar payına sahib olub. Qeyd edək ki, AMD ilin ilk rübündə satışlarını rekord səviyyədə azaldıb və bazar payı 12% olub. Jon Peddie Research (JPR) tərəfindən dərc edilən hesabata görə, masaüstü xarici qrafik kartları bazarında satışlar keçən illə müqayisədə azalsa da, keçən ilin eyni dövrü ilə müqayisədə artıb.
Bazardakı brendlərə baxdığımızda isə Nvidia şirkətinin əzici üstünlüyü gözə çarpır. Bazarın azalmasına baxmayaraq, Nvidia satışlarını əvvəlki rüblə müqayisədə 8% artıraraq 88% bazar payına sahib olmağı bacarıb. Bu rəqəm şirkətin son illərdə əldə etdiyi ən böyük bazar payıdır. AMD-nin satışları isə 41% azalıb. Buna baxmayaraq şirkət 12% bazar payı qazana bilib. 2022-ci ilin üçüncü rübündə Arc A770 və A750 modelləri ilə qrafik kartı bazarına daxil olan Intel-in satışları isə əhəmiyyətsiz dərəcədə az olaraq qalıb.
İlin birinci rübündə masaüstü xarici qrafik kartı tədarükü 8,7 milyon ədəd olub. Bu rəqəm əvvəlki rübdə 9,5 milyon satışın gerisində qalsa da, ötən ilin eyni dövrü ilə müqayisədə 39% artım qeydə alınıb. Gələcək proqnozlara nəzər salsaq, istehlakçı GPU bazarında durğunluğun davam edəcəyi, eyni zamanda süni intellektli GPU-lara tələbatın artacağı gözlənilir. Bundan əlavə qeyd edək ki, Nvidia ötən gecə 3 trilyon dollar dəyəri ötərək Apple şirkətini geridə qoyub. Beləliklə dünyanın ən dəyərli 2-ci şirkəti artıq Nvidia-dır.
