Microsoft-un kompüterinizdə olan hər şeyin skrinşotlarını çəkən yeni süni intellekt funksiyası olan Recall ciddi təhlükəsizlik zəifliyi ilə gündəmdədir. Ekspertlər bildirir ki, Recall istifadəçilərin təhlükəsizliyi üçün fəlakət yarada bilər. Microsoft bu yaxınlarda keçirdiyi tərtibatçı konfransında süni intellektli kompüterlərini elan etmişdi. Bu kontekstdə təqdim edilən xüsusiyyətlərdən biri “Recall” idi.
Qeyd edək ki, Recall funksiyası kompüterdə etdiyiniz hər şeyi izləyə və sizinlə paylaşa bilər. Təxmin edildiyi kimi bu tip xüsusiyyətlər bir çox təhlükəsizlik və məxfilik problemlərinə sahib ola bilir. Recall, quraşdırılmış süni intellekt modelləri ilə kompüterlərinizdə olan hər şeyin skrinşotlarını çəkir. Axtarış etdiyiniz zaman istədiyiniz məlumatı saniyələr ərzində əldə edə bilərsiniz. Hətta araşdırmaq imkanı təklif edən bir zaman axışı belə mövcuddur. Microsoft təqdimat tədbirində funksiyanın təhlükəsiz olduğunu bildirmişdi. Amma sınaqlar ortaya çıxarıb ki, bu funksiya iddia edildiyi qədər təhlükəsiz deyil.
2020-ci ildə qısa müddət ərzində Microsoft-da da işləyən kibertəhlükəsizlik üzrə mütəxəssis Kevin Beaumont, Recall funksiyasında ciddi təhlükəsizlik zəifliyi aşkar edib. Son bir həftə ərzində funksiyanı sınaqdan keçirən Beumont, bu xüsusiyyətin verilənlər bazasında düz mətn şəklində məlumatları saxladığını aşkar edib. Bu isə pis niyyətli bir şəxsin məlumat bazasına və ya onun məzmununa daxil ola biləcəyini göstərir. Beaumont iddia edir ki, hakerlərin bu məlumatları əldə etməsi olduqca asandır. Kibertəhlükəsizlik üzrə mütəxəssis X-dəki yazıda bu verilənlər bazası nümunəsini də paylaşıb. Yazıda o, hakerlərin Recall fəaliyyətlərinə uzaqdan daxil ola bilməyəcəyini bildirdiyi üçün Microsoft-u tənqid edib. Bildirib ki, verilənlər bazasına administrator olmadan da daxil olmaq mümkündür.
