WhatsApp, Instagram, Facebook kimi məşhur tətbiqlərin qurucusu olan Meta şirkəti 11 min işçisini ixtisar edəcəyini açıqlayıb. Xatırladaq ki, şirkət keçən il Facebook adını dəyişərək Meta etmişdi. Son günlərdə isə Mark Zukerberqin Metaverse xəyalının şirkətə milyonlar dollar zərər verməsi və TikTok tətbiqinin, Instagram qarşısında gözlənilməz yüksəlişi nəticəsində şirkət rəhbəri belə bir addım atır. Belə ki, şirkət işçi qüvvəsinin sayını təxminən 13 faiz azaldaraq şirkət tarixində ilk kütləvi ixtisarlarda minlərlə işçi ilə yollarını ayırıb.
Şirkətin icraçı direktoru olan Mark Zukerberq bu ixtisarı COVID-dən sonra onlayn dünyanın inkişafı ilə bağlı proqnozlarının gözlənildiyi kimi olmaması və şirkətin artan rəqabət, həmçinin reklam itkisi ilə üzləşməsi ilə əlaqələndirib. Onun sözlərinə görə şirkətin investisiyalarını əhəmiyyətli dərəcədə artırması gəlirlərin azalması ilə nəticələnib. Qeyd edək ki, Zukerberq son zamanlarda Metaverse virtual dünyasına etdiyi investisiyalar ilə gündəmə gəlirdi. Şirkətin 2004-cü ildən bəri etdiyi ilk böyük ixtisardan sonra Zukerberq şirkətin bundan sonra daha səmərəli olacağını qeyd edib. Bundan əlavə isə şirkətin əsas resurslarını reklam, süni intellekt və təbii ki, metaverse kimi sahələrə yönəldəcəyini bildirib.
Meta şirkəti sentyabr ayına olan hesabatında 87 min işçi heyətinin olduğunu bildirmişdi. İndi isə onlarda 11 mini ilə yollarını ayırır. Şirkət bu işçilərin işdən çıxarılma haqqını, 6 ay ərzində sağlamlıq sığortasını həmçinin yeni iş tapmaları üçün kariyera dəstəyinin göstəriləcəyini qeyd edib. Əlavə olaraq qeyd edək ki, şirkətin səhm qiymətləri keçən il ilə müqayisədə 70 faiz ucuzlaşıb. Lakin son ixtisarlardan sonra səhm qiymətləri sadəcə 4 faiz bahalaşıb. Şirkət 2023-cü ildə daha çox gəlir itirəcəyini proqnozlaşdırır.
