Yəqin ki, bir çox Xiaomi istifadəçisi MIUI interfeysinin daxilindəki tətbiqlərdə reklamlarla qarşılaşıblar. Əsasən, daha passiv istifadə olunan sistem tətbqilərində görülən reklamlar bir-bir parametrlərdən bağlanıla bilir. Lakin bir çox istifadəçi bunu necə edəcəyi barədə ya xəbərdar deyil, ya da bunu etmək onlara xeyli çətin gəlir. Nəticədə istifadəçi təcrübəsinə MIUI interfeysindəki daxili reklamlar mənfi bir amil kimi təsir edir. Hətta bəzən yeni qutudan çıxartdığınız smartfonda MIUI interfeysi ilə birlikdə gələn reklam xarakterli tətbiqlərin önyükləməsini belə görmək olur. Verilən məlumata görə Xiaomi şikrəti MIUI 14 interfeysində bu reklamları tamamilə yığışdıra bilər.
Belə ki, Çinin müxtəlif tanınmış resursları tərəfindən verilən məlumatda MIUI 14 interfeysinin sonuncu beta variantında sistem daxili reklamların tamamilə yığışdırıldığı bildirilib. Qarşıdakı həftələrdə Xiaomi 13 seriyası ilə birlikdə təqdim ediləcək MIUI 14 interfeysində şirkət reklamları ləğv etməkdən əlavə, tətbiq önyükləmələrini ləğv edə bilər. Yəni üstdəki abzasda qeyd etdiyimiz kimi, smartfonu qutudan çıxardığınız zaman Android 13 əməliyyat sistemi üzərində təmiz bir MIUI 14 interfeysi ilə qarşılaşmaq mümkün görünür. Təbii ki, MIUI 14 ilə gələn yeniliklər təkcə bundan ibarət olmayacaq. İnsayderlərin bildirdiyinə görə Xiaomi şirkəti MIUI 14 ilə interfeysi daha da sadələşdirmək və praktikləşdirmək istəyir.
Ən sual altında qalan məqam isə bu yeniliklərin Çində olduğu kimi, qlobal bazarda da tətbiq edilib-edilməyəcəyi ilə əlaqədardır. Ümid edirik Xiaomi şirkəti bu yenilikləri Çində tətbiq edib, MIUI 14 interfeysinin qlobal variantında reklamları saxlamağa davam etməz. Lakin şirkətin istifadəçiləri markaya cəlb etmək üçün bu addımı atdığını nəzərə alsaq böyük bir ehtimalla bu yenilik bütün dünyanı əhatə edəcək.
