Ötən gün Apple şirkətin 10 illik Apple Car layihəsini ləğv etdiyini açıq-aşkar bəyan etmişdi. Hətta bu xəbərə Tesla şirkətinin qurucusu Elon Musk da reaksiya vermişdi. Ümumiyyətlə Xiaomi və digər texnologiya nəhənglərinin avtomobil dünyasına qatıldığı bir vaxtda Apple riskə gedə bilmədi. İndi isə Apple şirkətinin ləğv edilən Apple Car layihəsinə nə qədər pul xərclədiyi barədə məlumat ortaya çıxıb.
Qeyd edək ki, Apple artıq 10 ilə yaxındır ki, “Project Titan” adlı gizli Apple Car layihəsi üzərində işləyirdi. Lakin texnologiya nəhəngi ötən günlərdə elektrikli və lüks avtomobil layihəsini ləğv etmək qərarına gəlmişdi. Apple bu layihədə çalışan insanların artıq süni intellekt tərəfinə fokuslandığını da bildirmişdi. İndi isə The New York Times tərəfindən dərc edilən yeni hesabatda ləğv edilən Apple Car layihəsinə xərclənən vəsait açıqlanıb. “Apple Car” şirkət daxilində “Project Titan” adlandırılsa da, xəbərlərə görə, “Apple” şirkətinin bəzi əməkdaşları bu təşəbbüsün başdan-başa iflasa uğrayacağını bilirdilər. Hətta işçilər öz aralarında bu layihəni Titanik fəlakəti də adlandırırdılar. Apple elektromobilini avtonom idarəetmə funksiyaları ilə təchiz etmək niyyətində idi. Həmçinin elektromobil böyük miqdarda istehsal edilməyəcəkdi və yüksək gəlir marjasına sahib olacaqdı. Onun qiymətinin isə ən azı 100 min dollar olması planlaşdırılırdı.
2014-cü ildə istifadəyə verilən və 2024-cü ildə ləğv edilən Apple Car layihəsi üçün Apple-ın xərclədiyi pul düz 10 milyard dollardır. Məlumatlara görə, bu müddət ərzində layihənin rəhbərləri də dəyişib. Rəhbərlikdəki dəyişikliklərin əsas səbəbi də məhz fikir ayrılıqları olub. Yəni layihə daxilində böyük bir əlaqə problemi olub. İlk olaraq Tesla rəqibi olması planlaşdırılan avtomobil, daha sonra Google-un tamamilə sürücüsüz Waymo-suna, hətta ən sonda yenidən Tesla ilə rəqibə çevrildi.
