Keçmiş Apple idarəçiləri tərəfindən qurulan Humane şirkəti 2023-cü ilin Noyabr ayında bizlərə süni intellekt əsaslı yenilikçi Humane AI Pin cihazını təqdim etmişdi. Qeyd edək ki, Humane şirkətinin arxasında 21 ildən çox müddət ərzində Apple-ın əsas məhsullarının dizaynı üzərində işləyən İmran Çaudhri (ilk iPhone daxil olmaqla) və 8 ildən çox Apple-da iOS və macOS əməliyyat sistemlərində işləyən Bethany Bongiorno dayanırdı. Ömrünü texnologiyada keçirən bu təcrübəli adlar qurduqları yeni şirkətlərlə fərqli bir texnologiya yaratmaq istəyirdilər. Şirkətləri üçün 100 milyon dollarlıq sərmayə yığmağı bacaran bu iki şəxs Humane AI Pin təqdim edərək bütün diqqətləri cəlb etmişdilər. Bununla belə, indi yeni çıxan xəbərə görə süni intellekt əsaslı və ekransız Humane şirkəti artıq bağlanır və şirkətin böyük bir hissəsi HP tərəfindən 116 milyon dollara alınıb.
Humane tərəfindən edilən açıqlamaya görə, HP şirkətin CosmOS bölməsini və bu bölmədə çalışan təxminən 300 nəfəri öz təşkilatına əlavə edəcək. HP həmçinin Humane-nin 300-dən çox patentini də alacaq. HP bütün bunlara görə 116 milyon dollar ödəməyə razı olub. HP bu satınalma ilə diqqətini süni intellekt texnologiyalarına yönəldəcək.
Qeyd edək ki, barmaq və əl jestləri ilə idarə edilən qualcomm imzalı Humane AI Pin cihazı snapdragon prosessoru ilə təchiz edilmişdi. O cümlədən AI Pin batareya ilə birlikdə sadəcə 54 qram ağırlığa və 13 MP kameraya sahib idi. Lakin, bütün bu cəlbedici xüsusiyyətlərə rəğmən cihazın ən böyük problemi qiyməti olmuşdu. Belə ki, bu sadə cihaz 699 dollar başlanğıc qiymətinə sahib olmuşdu. Ümumiyyətlə, Humane AI Pin cihazı flaqman smartfonlarda olan AI xüsusiyyətlərindən heç də sürətli deyildi. Maraqlısı budur ki, cihazdakı süni intellekt sistemlərinə daxil ola bilmək üçün istifadəçilər aylıq 24 dollar ödəməli idilər.
