Son dövrdə Huawei brendinə tətbiq edilən sanksiyaların sayı və həcmi çoxaldıqca Huawei daha çox inkişaf edir. Belə ki, ötən günlərdə dünya mediasının diqqətini cəlb edən və ABŞ sanksiyalarına məhəl qoymayan Huawei yeni Mate 60 seriyasında öz istehsalı oln Kirin 9000s çipsetindən istifadə etmişdi. Daha əvvəl isə texnologiya nəhəngi öz əməliyyat sistemi olan HarmonyOS-a keçid etmişdi. İndi isə bunlar az imiş kimi, Huawei öz yerli istehsalı olan CMOS adlı kamera sensoru hazırlayır. Bunun da səbəbi Sony və Huawei arasında maneə törədən ABŞ sanksiyalarıdır.
Əvvəllər Huawei bütün flaqman smartfonlarında rəqibləri kimi Sony kameralarından istifadə edirdi. İndi isə vəziyyət qəlizləşdiyi üçün Sony yalnız icazə verilən sensorlarını Huawei şirkətinə tədarük edə bilir. Vəziyyət belə olduqda isə Huawei özü bu problemi aradan qaldırmaq üçün işə qoyulub. Beləliklə Huawei brendi bu dəfə öz yerli istehsalı CMOS adlı kamera sensorlarını hazırlayır. Qeyd edək ki, Huawei bir qədər köhnə texnologiyalardan istifadə etsə də, Kirin 9000s çipseti ilə smartfonlarında 5G dəstəyini və yüksək performansı davam etdirə bilmişdi. Hətta bu addım o qədər diqqət çəkdi ki, investorlar Çinli prosessor istehsalçılarına yatırım etməyə başlamışdı.
Əslində tətbiq edilən sanksiyalar yalnız Huawei üçün mənfi olmadı, həmçinin Sony də bu qərardan sonra gəlirlərini əvvəlki vəziyyətdə saxlaya bilməyib. Lakin buna baxmayaraq Huawei yeni P70 flaqman seriyasında Sony ilə əlaqələri tamamilə kəsməyi planlayır. Belə ki, şirkət ana lövhədən tutmuş, kamera və çipə qədər bütün istehsal prosesini öz fabriklərində hazırlamaq üçün işə qoyulub. Hal-hazırda Omnivison Çində ən yaxşı sensorları hazırlayır. Bu baxımdan Huawei-nin CMOS sensorlarının nə qədər iddialı olacağı bilinmir, lakin ilk nümunələri Huawei P70 və Huawei Mate 70 modellərində görə biləcəyimiz iddia edilir. Qeyd edək ki, Omnivision daha əvvəl Leica və Sony ilə birlikdə sensorlar hazırlayıb.
