Dünyanın ən böyük avtomobil icarəsi şirkətlərindən biri olan Hertz 20 min elektromobilini sataraq benzinlə işləyən avtomobillərlərlə əvəzləyir. Ümumiyyətlə dünyada elektromobillərin bu qədər populyarlaşdığı və dəyər qazandığı dövrdə Hertz əksəriyyəti Tesla brendinə məxsus olan elektromobillərini satmaq qərarına gəlib. Bəs gəlin görək səbəb nədir?
Dünyanın 145 ölkəsində fəaliyyət göstərən Amerika mərkəzli avtomobil icarəsi şirkəti Hertz, ABŞ-dakı 20 min elektromobilini daxili yanma mühərrikli avtomobillər ilə daha çox gəlir əldə edə bilmək üçün əvəzləyir. Belə ki, Hertz-in açıqlamasına görə elektrikli avtomobillərin icarəsinə tələbat aşağıdır və qəzaya uğrayan elektromobillərin təmir xərcləri də kifayət qədər yüksəkdir. Şirkət elektromobilləri icarəyə verməklə planlarına uyğun gəliri əldə edə bilmir. Bunun əvəzinə isə şirkət həlli daxili yanma mühərrikli avtomobillərdə tapır.
İlk mərhələdə Hertz nisbətən sərfəli qiymətə 700 fərqli elektromobilini satacağını elan edib. Hətta Hertz-in xüsusi olaraq 35 Chevrolet Bolt, 4 Kia EV6, 1 BMW i3, 1 Nissan Leaf, 552 Tesla Model 3 və 121 Tesla Model Y satacağı iddia olunur. Görünən odur ki, elektromobillər Hertz üçün heç də yaxşı gəlir qaynağı deyil. Həmçinin avtomobil icarəsi şirkəti indi satacağı elektromobillərin əvəzində daha çox sayda daxili yanma mühərrikli avtomobil ala biləcək və gəlirlərini artıracaq.
