NVIDIA şirkətinin, ötən aylarda təqdim etdiyi GeForce RTX 4090 qrafik kartı ilə bağlı istifadəçilər tərəfindən narazılıqlar yaranmışdı. Belə ki, brendin ən performanslı qrafik kartı çox isindiyi üçün elektrik kabelləri zərər görürdü. Hətta bu hadisə ilə bağlı bir çox Reddit istifadəçisi paylaşımlar etmişdi. Şirkət bu paylaşımlarla bağlı açıqlama verərək bildirmişdi ki, qrafik kartının elektrik kabellərini təlimatlara əməl edərək düzgün formada quraşdırmaqla problemi aradan qaldırmaq olar. Lakin Lucas Genovo adlı istifadəçi bu yaxınlarda 16 pinli güc adapterinin əriməsi ilə bağlı şirkəti məhkəməyə verib. Belə ki, məhkəmədə şirkəti fırıldaqçılıq etməsi və Nyu-York Ümumi Ticarət Məcəlləsinin pozulmasına görə ittiham edilib.
Lucas Genovo GeForce RTX 4090 qrafik kartını BestBuy e-ticarət səhifəsindən 1599 dollara aldığını və təlimatlara diqqətlə əməl edərək onu kompüterə quraşdırdığını qeyd edib. Bir müddət sonra isə 16 pinli 12VHPWR güc adapterinin əridiyini müşahidə edib. İddiaçı bu qrafik kartlarının bazardan yığışdırılmasının vacib olduğunu bildirir. Həmçinin o Reddit üzərində paylaşılmış digər görüntüləri də sübut olaraq məhkəmədə istifadə edib və bütün zərərçəkən istifadəçilər adından şirkəti şikayət etdiyini bildirib. Qeyd edək ki, Reddit platformasında RTX 4090 qrafik kartının 16 pinli güc adapterinin əriməsi ilə bağlı görüntü paylaşan 26 istifadəçi var.
NVIDIA şirkəti Geforce RTX 4090 qrafik kartının təlimatında kabeli əyən zaman onu qrafik kartından ən azı 35 mm məsafədə saxlayaraq əymək lazım olduğunu qeyd etmişdi. NVIDIA ilk hadisədən sonra hələ də 16 pinli güc adapterinin əriməsi ilə bağlı problemi araşdırsa da müəyyən edə bilməyib.
