Canalys analitik şirkəti 2024-cü ilin ikinci rübü üçün mobil prosessor bazarı haqqında hesabat dərc edib. Beləliklə, mobil prosessor istehsalçıları ilə bağlı olan hesabata görə ən böyük istehsalçı məhz MediaTek brendi olub. Qeyd edək ki, Hesabatda çipset istehsalçılarının tədarükləri və gəlirləri, eləcə də bu və ya digər şirkətin çiplərindən istifadə edən hər bir smartfon istehsalçısının payı haqqında statistik məlumat verilir.
Mobil prosessor tədarükü üzrə mütləq lider 2024-cü ilin ikinci rübündə 115,3 milyon çip tədarük edən MediaTek olub. Belə ki, şirkət ötən il eyni dövrü ilə müqayisədə 7% artım əldə edib. İkinci və üçüncü yerlərdə müvafiq olaraq 71 milyon (+6%) ilə Qualcomm və 46 milyon (+6%) ilə Apple qərarlaşıb. Dördüncü yerdə Çinin Unisoc şirkəti qərarlaşıb və onun il ərzində tədarükləri rübdə təsirli şəkildə 42% artaraq 25 milyona çatıb. Sonrakı yerləri 17 milyon (+9%) ilə Samsung, 8 milyonla HUAWEI HiSilicon tutur. Qeyd edək ki, 2023-cü ilin eyni dövrü ilə müqayisədə 3% azalmaya sahib olan Google sadəcə 2 milyon ilə siyahının sonlarında yer alır.
Gəlir baxımından lider 2024-cü ilin ikinci rübündə tədarük edilən prosessorlarının dəyəri 47 milyard dollar olan Apple şirkətidir. Bu göstəriciyə görə Qualcomm 31 milyard dollarla ikinci, MediaTek isə 22 milyard dollarla üçüncü yerdədir. Müqayisə üçün qeyd edək ki, Google-un çipləri cəmi 1 milyard dollar dəyərindədir. Hesabata görə, 2024-cü ilin ikinci rübündə tədarük edilən bütün smartfonların 40 faizi MediaTek prosessorları ilə təchiz edilib. Qualcomm çipləri ikinci ən populyar olub və bütün cihazların 25 faizi bu çiplər ilə təchiz olunub. Üçüncü yerdə 16% payla Apple şirkəti qərarlaşıb. İkinci rübdə MediaTek prosessorlarının ən böyük müştəriləri Xiaomi (23%), Samsung (19%) və OPPO (17%) olub. Qualcomm-da birinci yeri Xiaomi (21%) və Samsung (21%), ikinci yeri vivo (16%) və Honor (15%) bölüşürlər.
