Daim paylaşımları ilə gündəmdə qalmağı bacaran Elon Musk bu dəfə TikTok rəqibi Vine ilə bağlı paylaşım edib. Belə ki, Elon X platformasında anket açaraq, Vine tətbiqinin geri gəlib-gəlməyəcəyini soruşub. Ümumiyyətlə, Elon Musk Twitter-i X platformasına çevirdikdən sonra sosial media platformasında hər şeyin edilə bilməsi üçün daim yeniliklər edir. Daim istifadəçi itkisi yaşasa da, Elon Musk Vine videoları ilə bu mənfi tendensiyaya son qoymuş görünür.
Vine barədə məlumatı olmayanlar üçün qeyd edək ki, Vine 2012-ci ildə yaradılıb. Məhz həmin ilin sonuna qədər isə Twitter tərəfindən 30 milyon dollara alınıb və 2016-cı ildə Twitter tərəfindən bağlanıb. 2015-ci ildə 200 milyondan çox aktiv istifadəçisi olan xidmət qısa video paylaşımlarına diqqət yetirdi və birdən-birə çox məşhurlaşdı. Hətta bu platforma özünəməxsus fenomenlərə sahib olmuşdu. Son illərdə Vine-ı yenidən gündəmə gətirən isə məhz Elon-un özüdür. Əslində Elon Twitter-i satın alarkən Elon paylaşım edib istifadəçilərə “Vine xidmətini geri gətirməliyikmi?” sualını vermişdi. Bu təəccüblü suala 5 milyona yaxın cavab gəlmişdi və səs verənlərin əksəriyyəti “hə” deməyi seçmişdi.
İndi isə Elon Musk TikTok rəqibi Vine ilə bağlı yenidən paylaşım edib. 2022-ci ildən Twitter mühəndislərinin üzərində çalışdığı platforma barədə hazırda heç bir məlumat yoxdur. Əslində bu platformanın 2022-ci ilin sonunda yenidən aktivləşəcəyi vəd edilmişdi. Köhnə kodlar və texnologiyalar səbəbiylə Vine-ni yenidən funksional hala gətirməyin asan olmayacağı deyilsə də, Maskın hələ də bunu istədiyi bildirilir.
