Çində tənzimləyici qurumlar, müəyyən növ simsiz şarj cihazlarının satışını qadağan etməyi planlaşdırır. Belə ki, yeni qaydalara əsasən, Apple-ın MagSafe və Qi2 şarj pedləri artıq Çində satılmayacaq.
Beləliklə, Apple şirkətinin 15 Vt simsiz şarj cihazlarının tezliklə Çində satışına qadağa qoyulacaq. Çin hökuməti bildirir ki, qadağalar parazitlərin qarşısını almaq və radio dalğalarının nizamını qorumaq üçündür. Sentyabrın 1-dən qüvvəyə minəcək Çinin Sənaye və İnformasiya Texnologiyaları Nazirliyinin yenilənmiş radiotezlik idarəetmə qaydaları, mobil və portativ simsiz şarj cihazları üçün yalnız üç tezlik diapazonunun qəbul ediləcəyini bildirir. Bunlar isə müvafiq olaraq 100-148,5 kHz, 6765-6795 kHz və 13553- 13567 kHz olaraq müəyyən olunub. Bundan əlavə, nominal şarj cihazlarının ötürmə gücü 80 Vt-dan çox olmamalıdır.
Qaydaların Apple-ın simsiz şarj cihazlarına təsir edəcəyi gözlənilir. Çünki, 15 Vt simsiz enerji doldurmanı dəstəkləyən Apple MagSafe və Qi2 standartları icazə verilən diapazondan kənarda olan 360 kHz tezliyində işləyir. Qadağa 15W simsiz şarj cihazlarının satışının qarşısını alacaq, lakin görünən odur ki, qüvvəyə minməmişdən əvvəl alınmış şarj cihazlarının istifadəsini qadağan etməyəcək. Bu qərarın nəticəsi olaraq artıq Çindən digər regionlara ixrac edilən şarj cihazları üçün də bəzi təsirlər meydana gələ bilər.
