BMW və Toyota hidrogen avtomobilləri üçün rəsmi olaraq ortaqlıq qurduqlarını elan ediblər. Beləliklə, BMW, yeni nəsil hidrogen əsaslı avtomobillərini 2028-ci ildə satışa çıxaracağını açıqlayıb. Toyota və BMW yeni nəsil sıfır emissiyalı avtomobillərin inkişafını sürətləndirmək üçün yeni anlaşma memorandumu imzalayaraq hidrogen yanacaq elementli avtomobillər sahəsində tərəfdaşlıqlarını gücləndiriblər.
BMW Toyota ilə birlikdə yeni nəsil yanacaq elementi güc aqreqatlarını hazırlayacaq. Belə ki, hidrogen əsaslı yeni modellərin kütləvi istehsalına 2028-ci ildə başlanılacaq və BMW hidrogen varianta sahib modelini məhz həmin il satışa çıxaracağını elan edib. BMW bu texnologiyanı illərdir təqib etsə də, yüksək xərclər və yanacaq doldurma infrastrukturunun olmaması səbəbindən hidrogen əsaslı avtomobillərini bazara çıxmaqda çətinlik çəkir. 2024-cü ilin ilk yarısında ABŞ-da yalnız 322 hidrogen yanacaq hüceyrəli avtomobil satılacağı halda, bu rəqəm keçən illə müqayisədə 82 faiz azalıb. Ötən il hidrogen avtomobillərinin qlobal satışı cəmi 9 min ədəd təşkil edib.
Toyota və BMW bu çətinliklərin öhdəsindən birlikdə gələ biləcəklərini düşünürlər. Avtomobil nəhəngləri hər ikisinin istifadə edəcəyi hidrogen güc aqreqatlarını birgə istehsal etməyi planlaşdırırlar. Birgə inkişaf və hissələrin tədarükü xərclərin azaldılmasına və texnologiyanın daha rəqabətli olmasına kömək etmək məqsədi daşıyır. Onlar həmçinin yanacaq elementli nəqliyyat vasitələrinin qəbuluna əsas maneə olan hidrogen yanacaqdoldurma stansiyalarının quraşdırılması üçün birgə işləyəcəklər. Xatırladaq ki, avtomobil nəhəngləri ilk dəfə 2012-ci ildə hidrogen daşıyıcıları üzərində güclərini birləşdirmişdilər.
