Avropa Komissiyası Apple-ın Rəqəmsal Bazarlar Aktı (DMA) çərçivəsində qarşılıqlı fəaliyyət üzrə öhdəliklərinə əməl etməsinə kömək etmək üçün prosedurlara başlayıb. Beləliklə, yeni qərar çərçivəsində Apple cihazları, üçüncü tərəf cihaz və aksesuarlar ilə uyğunlaşaraq fəaliyyət göstərəcək. Apple şirkətinin illərdir həyata keçirdiyi qapalı ekosistem siyasəti indi iflasa uğrayacaq.
Avropa Komissiyası Apple-ın Rəqəmsal Bazarlar Aktı (DMA) çərçivəsində qarşılıqlı fəaliyyət üzrə öhdəliklərinə əməl etməsinə kömək etmək üçün iki tədbirə başlayıb. Komissiya mövzu ilə bağlı aşağıdakı açıqlamanı verib: “Apple üçüncü tərəf tərtibatçılarına və şirkətlərinə DMA altında müəyyən edilmiş Apple əməliyyat sistemləri iOS və iPadOS tərəfindən idarə olunan aparat və proqram təminatı xüsusiyyətləri ilə pulsuz və effektiv qarşılıqlı fəaliyyət təmin etməlidir”. Daha dəqiq desək, Avropa Apple-dan öz ekosisteminin üstünlüklərini simsiz qulaqlıqlar, ağıllı saatlar və VR qulaqlıqları kimi üçüncü tərəf cihazlarına açmasını istəyir. Bura Avropa Komissiyası tərəfindən müəyyən edilmiş cihaz cütləşməsi, bildirişlər və qoşulma kimi funksiyalar daxildir.
Komissiyanın ikinci tələbi odur ki, Apple, üçüncü tərəf tərtibatçılarının iOS və iPadOS sistemləri ilə birgə işləmək üçün müraciətlərinə baxış həyata keçirsin. Komissiya Apple-dan tələbləri şəffaf, vaxtında, ədalətli və əlavə xərc çəkmədən yerinə yetirməsini istəyir. Habelə, Apple şirkəti artıq üçüncü tərəf iOS və iPadOS tərtibatçıları üçün qarşılıqlı fəaliyyətin tətbiqini təsdiqləyən rəsmi bəyanat yayıb. Avropa Komissiyasının tələblərinin gələn il tamamlanması planlaşdırılır. Əgər bunlara əməl olunmazsa, Apple qlobal illik dövriyyəsinin 10%-i qədər cərimələnə bilər.
