Dünyanın ən böyük mobil çip dizaynerlərindən biri olan Qualcomm tezliklə Intel-i satın ala bilər. İddialara görə, San Diego şəhərində yerləşən şirkət bu yaxınlarda Intel üçün təklif verib. Görünən odur ki, Qualcomm ən böyük rəqiblərindən birini alaraq bazarda liderə çevrilmək istəyir.
Xüsusilə son 20 ildə Windows kompüterlərinin sevimlisinə çevrilən Intel, son illərdə bəzi iqtisadi problemlərlə üzləşib. Apple-ın öz prosessorlarını dizayn etməyə başlaması və bazarda rəqabət yaradan AMD-nin Ryzen və EPYC prosessorları Intel-in bazarda zəifləməsinə səbəb olub. Bir müddətdir maliyyə problemlərinə çarə axtaran şirkət tezliklə gözlənilməz müqavilə imzalaya bilər. Etibarlı mənbələri ilə tanınan Wall Street Journal, Qualcomm şirkətinin bu yaxınlarda Intel şirkətini almaq üçün təklif verdiyini açıqlayıb. Intel-in bu təklifə necə cavab verdiyi hələ məlum deyil, lakin iki şirkətin birləşməsi yarımkeçirici və prosessor sənayesini tamamilə dəyişə bilər.
Xatırladaq ki, bu yaxınlarda Intel, Foundry bölməsini müstəqil edəcəyini elan etmişdi. Bununla da şirkət TSMC və Samsung-a qarşı yeni rəqabət strategiyası hazırlamışdı. Bu istiqamətdə şirkət “Intel 3” istehsal prosesində Amazon üçün Xeon 6 çiplərini və AWS serverləri üçün süni intellekt çiplərini istehsal edəcək. Bundan əlavə, Intel, xərcləri azaltmaq üçün 15.000 nəfərin işdən çıxarılacağını da açıqlayıb. Şirkətin iqtisadi problemlərini görən Qualcomm Intel-i satın almaq üçün işə başlayıb. Ümumiyyətlə, Qualcomm-un Intel-i əldə etmək cəhdi dünyanın bir çox hökumətlərinin antiinhisar araşdırmalarına başlamasına səbəb olacaq. Bununla belə, Intel-in qeyri-Amerika şirkəti tərəfindən alınmasının qarşısını almaq istəyən ABŞ hökuməti milli təhlükəsizlik məqsədilə Qualcomm və Intel-in birləşməsinə icazə verə bilər. Qualcomm və Intel hələ də iddialarla bağlı açıqlama verməyiblər, lakin iddialar doğrudursa, yaxın həftələrdə daha ətraflı məlumat ortaya çıxacaq.
