Bildiyimiz kimi, Apple şirkəti ötən günlərdə baş tutan WWDC 2024 çərçivəsində rəsmi olaraq ChatGPT çatbotundan istifadə edəcəyini və hətta Siri köməkçisinin daha ağıllı hala gələcəyini elan etmişdi. Bununla yanaşı, uzun müddətdir ki, haqqında iddialar irəli sürülən Apple və OpenAI əməkdaşlığı da rəsmiləşmişdi. İndi isə Apple və OpenAI arasındakı əməkdaşlığın təfərrüatları ortaya çıxıb. Belə ki, Apple şirkəti cihazlarında olan ChatGPT çatbotu üçün OpenAI şirkətinə pul ödəməyəcək.
Apple bu həftənin əvvəlində WWDC 2024 tədbiri çərçivəsində keçirilən təqdimatında “Apple Intelligence” adlı süni intellekt xüsusiyyətlərini açıqlamışdı. Bundan əlavə, o, ChatGPT-nin iPhone, iPad və Mac cihazlarına inteqrasiya ediləcəyini də rəsmi olaraq elan etmişdi. OpenAI-nin məşhur çatbot istifadəçilər cihazlarında olan bir çox xüsusiyyət üçün kömək edəcək. İndiyə qədər Apple və OpenAI şirkətləri arasında olan razılaşmanın maliyyə tərəfi ilə bağlı heç bir məlumat yox idi. Bloomberg-dən Mark Gurman bu məsələyə işıq salan və bizə pərdə arxasında baş verənlər haqqında fikir verən bir məqalə paylaşıb.
Gurmanın mənbələrinə görə, OpenAI və Apple arasındakı əməkdaşlığın iki tərəf üçün hər hansı maliyyə gəliri gətirəcəyi gözlənilmir. Başqa sözlə, nə Apple şirkəti OpenAI-yə nə də, OpenAI şirkəti Apple-a bu əməkdaşlıq üçün pul ödəmir. Bunun əvəzinə, Apple iOS 18 inteqrasiyasının OpenAI üçün puldan daha dəyərli olduğunu düşünürdü. Texnologiya nəhənginin fikrincə, OpenAI brendi və texnologiyasını yüz milyonlarla cihaz və istifadəçiyə təqdim etmək pul ödənişindən daha böyük dəyərə malikdir. OpenAI və Apple arasında əməkdaşlıq çərçivəsində cihazlara əlavə edilən ChatGPT pulsuz olaraq təklif olunacaq. Bununla belə, o, yalnız iPhone 15 Pro və daha yeni cihazlara gələcək. Bundan əlavə, Apple-ın süni intellektlə bağlı gələcək planları ilə bağlı təfərrüatlar da qeyd olunub. Bloomberg-in məlumatına görə, şirkətin məqsədi gələcəkdə süni intellekt şirkətləri ilə gəlirləri paylaşmağa imkan verən müqavilələr bağlamaqdır.
