Ötən günlərdə rəsmi olaraq ləğv edilən və dayandırılan gizli Apple Car layihəsinin təfərrüatları ortaya çıxıb. 10 illik inkişaf və 10 milyard dollar xərcin ardınca ləğv olunan Apple Car layihəsi ilə bağlı detallar məşhur analitik tərəfindən paylaşılıb. Bloomberg-dən olan Mark Gurman, Apple insayderlərindən və dizaynerlərindən aldığı məlumata əsasən, şirkətin avtomobilin hazırlanması zamanı hansı ideyalara malik olduğunu və nə üçün sonda layihədən imtina etmək qərarına gəldiyini izah edib.
Qurmanın sözlərinə görə, Apple-ın ilk prototiplərindən biri futuristik Canoo miniveninə bənzəyirdi. Belə ki, avtomobilin şüşə qapılara və tənzimlənən rəng sisteminə sahib tavana sahib olması gözlənilirdi. Maraqlısı budur ki, avtomobilin ön və arxa tərəfi tamamilə eyni olub. Bu isə onun kənardan baxanda hansı istiqamətdə getdiyini bilməkdə çətinlik törədirdi. İnkişaf prosesi zamanı şirkət uğursuz avtomobilin eksteryerini və interyerini bir neçə dəfə dəyişib. Bir çox versiyada avtomobilin salonun mərkəzində videolara baxa və FaceTime vasitəsilə ünsiyyət qura biləcəyiniz böyük televizorla təchiz edilməsi təklif edilirdi.
Digər mərhələlərdə isə avtomobilin tavandan asılan daha kiçik iPad ölçülü ekranlarla təchiz edilməsi təklif edilib. Avtomobilin oturacaqları şəxsi təyyarələrin oturacaqlarına bənzəyirdi, uzanırdı və ayaq dayaqları ilə təchiz olunmuşdu. Qeyd edək ki, Apple Car layihəsinin təfərrüatları bununla kifayətlənmir. Belə ki, avtomobilin inkişafına Apple-ın baş dizayneri Jony Ive olduğu vaxtlarda başlanmışdı. İlk versiya Canoo modelinə bənzəsə də, daha sonra o müasir VW ID.Buzz-a bənzəyirdi. Gurman bildirir ki, avtomobilin dizayn tərəfində ən son yenilik Tesla Model X modellərindəki qapıların tətbiqi olub. Ümumiyyətlə, Apple öz elektromobilini hazırlayarkən daha çox miniven olmasını nəzərdə tutub.
Bütün bu istehsal təcrübələrinə və mühafizəkar hesablamalara görə, Apple-ın elektrik avtomobilinin qiyməti təxminən 120 min dollar olmalı idi. Buna baxmayaraq şirkət qiymətin sadəcə 85 min dollar olmasını hədəfləyirdi. Nəhayət 5-ci səviyyə avtonom sürüş texnologiyasına sahib olmadığından və qiymət tərəfində də istədikləri nəticəni əldə edə bilmədikdən sonra Tim Cook layihəni sonlandırıb.
