E-ticarət nəhəngi Amazon, logistik mərkəzlərindəki robot investisiyaları ilə illərdir diqqət çəkir. Belə ki, şirkət öz mərkəzlərində avtomatlaşdırmanı inkişaf etdirmək üçün, həm orada işləmək üçün robot sistemləri sifariş edir, həm də bu yaxınlarda insanabənzər robotlardan istifadə etməyə başlayıb. Son hesabatlara görə, Amazon-un robotlarla baş tutan texnoloji transformasiyası 2030-cu ilə qədər hər il 10 milyard dollara qədər qənaət edə bilər.
Amazonun robotlarla işləyən anbarları son on ildə getdikcə daha çox yayılmışdır. 2021-ci ildə 350 min olan robotların sayı 2023-cü ilin ortalarında 750 mini keçib. Bu avtomatlaşdırma prosesi sifarişin hazırlanmasından tutmuş inventarların idarə olunmasına qədər bir çox mərhələdə işçi qüvvəsinə ehtiyacı azaldır. Morgan Stanley hesabatında qeyd edildiyi kimi, Amazon son üç il ərzində icra prosesinin demək olar ki, hər mərhələsini əhatə edən altı yeni böyük anbar robotu hazırlayıb. Bunların arasında ən diqqət çəkəni Digit adlı insanabənzər robotdur. “Agility Robotics” şirkətinin istehsalı olan 175 sm hündürlükdə və 65 kq çəkidə olan bu robot irəli, geri və yan hərəkət edə, eləcə də əşyaları qaldırıb daşıya bilir.
Bundan əlavə, sentyabr ayında Amazon Luizianada şirkətin bütün ən yeni robotlarını özündə əks etdirən ilk icra mərkəzini açıb. Morgan Stanley, pik dövrlərdə bu mərkəzdə icra xərclərinin 25 faiz azalacağını gözləyir. Amazon həmçinin ABŞ-dakı sifarişlərinin 30 faizini robotlarla dəstəklənən mərkəzlərdən yerinə yetirərsə, hər il 4,5 milyard dollardan 9 milyard dollara qədər qənaət edəcəyi gözlənilir. Bu nisbət 40 faizə yüksələrsə, Amazon qənaət robotlarla ildə 10 milyard dollar qənaət edə bilər. Ənənəvi Amazon anbarının tikintisi təqribən 200 milyon dollara başa gəldiyi halda, ən müasir robotların köməyi ilə yaradılan mərkəzlər 450 milyon dollara başa gələ bilər. Hətta mövcud anbarları robot sistemlərə uyğunlaşdırmaq üçün 100 milyon dollar investisiya tələb olunur.
