Startup Wise Guys akselerasiya proqramı dünyanın aparıcı akselerasiya proqramlarından biridir. Belə ki, Startup Wise Guys akselerasiya proqramının beşinci seriyasına start verir. Bu proqramda da iştirak edəcək startapların siyahısı dərc edilib. Qarşıdakı 5 ay müddətində Rumıniyanın paytaxtı Buxarestdə keçiriləcək akselerasiya proqramına Azərbaycan startapı olan Perkskit də iştirak etmək hüququ qazanıb.
Akselerasiya ifadəsinin nə olduğunu bilmirsinizsə, əsasən yeni başlayan startapların və kiçik biznes sahiblərinin bazarda uduzmayıb inkişaf etməsi üçün nəzərdə tutulan proqramlara deyilir. Perkskit startapı isə qlobal arenada 11 seçilmiş startapla birlikdə Startup Wise Guys akselerasiya proqramında inkişafını davam etdirəcək.
Gəlin, yerli startapın hansı fəaliyyətlə məşğul olduğunu sizlərə izah edək. Məsələn, işlədiyiniz şirkət sizə işçi olaraq şirkətin özü tərəfindən hazırlanmış müxtəlif imtiyazlar verir. Perkskit isə işçilərin istəyinə uyğun imtiyazların, imkanların yaradılmasına şərait yaradan platforma rolunu oynayır.
Məsələn, işlədiyiniz şirkət öz işçiləri üçün hansısa mağazadan güzəştli məhsul ala biləcək imtiyaz yaradıb. Siz də bundan istifadə etmək istəmirsiniz və ya sizin üçün maraqlı deyil. Bu halda şirkət öz xərclərini boş yerə artırmış olur. Lakin Perkskit ilə özünə uyğun imtiyaz yaradan işçi istədiyi imtiyaz təklifini bildirərək şirkətlərin büdcələrinə qənaət etməsini təmin edir və lazımsız xərclərin qarşısını alır. Eyni zamanda alınan imtiyazlar işçi tərəfindən daha dəyərli qarşılanır.
Nəticədə Perkskit korparativ imtiyazlar sisteminə yeni həll yolu gətirir və işçilərə dəyərli olduğunu hiss etdirən yeni fürsət yaradır. Həmçinin şirkətlərin də effektivliyi artımla müşahidə olunur. 90.000 avro investisiya ilə birlikdə Perkskit startapı Fuad Muradov, Fərid Ağamalıoğlu və Faiq Rüstəmovun həmtəsisçiliyində yaradılmışdır. Azərbaycan startapının məqsədi “uğura gedən yol xəritələrindəki inkişafın növbəti mərhələlərini açmaqdır“. Tedroid olaraq, həmyerlilərimizə uğura gedən yolda uğurlar arzulayırıq!
