Mobil rabitə texnologiyaları sahəsində dünya liderlərindən biri olan “Nokia” şirkətinin rəqəmsal infrastruktur sahəsində innovasiyalar və texnologiyalar üzrə lider şirkət olduğunu vurğulayan Olaf Şults Azərbaycan hökumətinin rəqəmsallaşma proqramının uğurlarını qeyd edib. Həmçinin ölkəmizin regionda böyük fəaliyyəti ilə seçilən ölkə olduğunu vurğulayıb və Nokia şirkətinin də həmin uğur hekayəsinin hissəsi olmaq istədiyini bildirib.
Olaf Şults transformasiya prosesində rəqəmsal savadlılığın artmasının vacibliyini vurğulayaraq bu sahədə ölkənin İnnovasiyalar və Rəqəmsal İnkişaf Agentliyi ilə əməkdaşlıq etdiklərini söyləyib.
“Təhsil proqramı üçün pul vəsaitləri ayırmışıq. Növbəti ay Bakıda laboratoriya və şəbəkəni istismara verəcəyik. Biz Azərbaycanı təkcə məhsul verdiyimiz bazar kimi qəbul etmirik. Bu gün bu işləri görürük və bundan fərəhlənirik. Bununla belə, ölkədə rəqəmsallaşdırma prosesinin bir hissəsi olmaq istəyirik”, – deyə Olaf Şults bildirib.
Bildirmək lazımdır ki, Nokia Tədqiqat Mərkəzinin 7 ölkədə — Finlandiya, Çin, Hindistan, İsveçrə, Keniya, ABŞ və Böyük Britaniyada nümayəndəlikləri var. Şirkətin ümumilikdə 15 zavodu fəaliyyətdədir. Finlandiyada və Çində 3, Böyük Britaniya, Braziliya, Cənubi Koreya, Meksika, Hindistan, Macarıstan və Rumıniyada isə 1 zavodu yerləşir.
Nokia ilk mobil telefon istehsalına 1982-ci ildə başlayıb. Həmin vaxt istehsal olunan telefonlar həcmcə böyük, 1G texnologiyasına malik telefonlar idi. 2G texnologiyasına malik telefonlar 1992-ci ildən etibarən buraxılmağa başlandı. İlk MP3 formatını dəstəkləyən telefonlar isə 2005-ci ildə bazara buraxıldı. Hal-hazırda şirkət 3G və 4G texnologiyasına malik telefonların istehsalı və təkmilləşdirilməsi ilə məşğul olur.
2009-cu ilin statistik məlumatlarına görə şirkət 432 milyon ədəd mobil telefon istehsal etmişdir. Bunların 68 milyonu smartfonlar idi. Şirkət bütün dünyada mobil telefon satışına görə birinci yerdə durur. Brend, 2010-cu ildə aparılan araşdırmaya əsasən 29.5 milyard dollar dəyərə malikdir. Brendinin dəyərinə görə Nokia brendi dünyada 8-ci yeri tutur. Nokia ilk onluqda olan şirkətlər arasında ABŞ-ı təmsil etməyən yeganə şirkətdir.
Startap ekosistemi xəbərlərini "İnnovasiya və Rəqəmsal İnkişaf Agentliyi" ilə tərəfdaşlıq çərçivəsində oxuyursunuz.
