“PAŞA Holding” təşkilatçılığı ilə Bakıda “InMerge İnnovasiya Sammiti” keçirilir. Dünən – 30 noyabr sammitin ilk günü baş tutub. Açılış zamanı “PAŞA Holding”in baş icraçı direktoru Cəlal Qasımov qonaqları və tədbir iştirakçılarını salamlayıb, sammitin təşkil edilməsinin əsas məqsədi və ölkəmiz, eləcə də region üçün önəmi barədə danışıb.
“Ölkəmizdə və regionda innovasiya ekosisteminin dəstəklənməsi əsas prioritetlərimizdəndir. Düşünürəm ki, hazırkı sammit bu hədəfə çatmağa böyük töhfə verəcək”, – deyə “PAŞA Holding”in baş icraçı direktoru Cəlal Qasımov bildirib.
Belə ki, cari sammit texnologiya sahəsində aparıcı şəxsləri və şirkətləri, eləcə də innovasiyayönümlü startapları Bakıda bir araya gətirmək, onlar üçün peşəkar müzakirələr, fikir və təcrübə mübadiləsi imkanı yaratmaq, ölkə və regionda innovasiya ekosisteminin formalaşmasına dəstək göstərmək məqsədini daşıyır.
Tədbirin ilk günü çərçivəsində sammitin açılışı üçün Rəqəmsal İnkişaf və Nəqliyyat Naziri Rəşad Nəbiyev, İqtisadiyyat nazirinin müavini Elnur Əliyev, Azərbaycan Respublikası Prezidentinin köməkçisi Şahmar Mövsümov və “Trendyol” şirkətlər qrupunun CEO-su Erdem İnan da səhnədə idilər. Onların çıxışının ardınca isə hamını həyəcanlandıran təqdimat baş tutdu və Steve Wozniak gələn hər kəsi salamladı. O, öz çıxışı zamanı məktəb vaxtlarındakı mühəndislik uğurlarına, Steve Jobs ilə tanışlığına, həmçinin “Apple”ın ilk günlərindən hekayələrə yer verdi.
Bunlarla yanaşı, “PAŞA Holding” dünyanın müxtəlif ölkələrindən iştirakçıları maliyyə texnologiyaları və telekommunikasiya vertikallarında, eləcə də təlimlərdə bir yerə toplayıb. Sammit çərçivəsində baş verən önəmli hadisələrdən biri də “Azərbaycan Respublikasında innovasiya və startap ekosisteminin inkişafı üçün əməkdaşlıq ilə bağlı Anlaşma Memorandumu”nun imzalanması olub. Memorandumu “PAŞA Holdinq”in İnnovasiyalar Şöbəsinin müdiri Fərrux Əliyev, İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzinin (4SİM) icraçı direktoru Fariz Cəfərov, Elm və Təhsil Nazirliyinin Təhsilin İnkişafı Fondunun sədri Elnur Nəsibov, Rəqəmsal İnkişaf və Nəqliyyat Nazirliyinin İnnovasiya və Rəqəmsal İnkişaf Agentliyinin sədri vəzifəsini icra edən İnara Vəliyeva, “SOCAR”ın vitse-prezidenti Kənan Nəcəfov imzalayıblar.
Qeyd edək ki, bu gün regionun ən böyük innovasiyalar sammitinin ikinci günü keçirilir.
