Ötən həftə keçirilən Startup Grind tədbirimiz əvvəlki paylaşımlarımızdan da bildiyiniz kimi ChatGPT və süni intellekt mövzusunu əhatə etmişdi. Tədbirin ən yadaa qalan məqamları xüsusilə ChatGPT dil modelinin nəyə görə Azərbaycanda işləmədiyi və eyni zamanda ölkəmizdən necə istifadə edə biləcəyinizə dair olmuşdu. Bütün bu detallar barədə saytımızdakı “Süni intellekt, ChatGPT və OpenAI” mövzusunda Startup Grind tədbiri baş tutdu!” başlıqlı məqaləyə keçid edərək ətraflı informasiya ala bilərsiniz. İndi isə bu həftə sonu keçirəcəyimiz növbəti tədbirə fokuslanmaq vaxtıdır. Belə ki, 28 fevral tarixində üçüncü “Startup Grind” tədbiri üçün spikerimiz Emil Musayev olacaq və o, Azərbaycanda kriptovalyutaların ölkədə tənzimlənməsi ilə bağlı yeniliklərin timsalında çox maraqlı bir mövzuya toxunacaq.
İlk olaraq gəlin sizə Emil Musayev barədə danışaq. Proqram mühəndisliyi, Layihələrin idarə edilməsi, Risklərin İdarə Edilməsi, Blokçeyn, Proqram təminatının test edilməsi, Dəyişikliklərin idarə edilməsi və.s olmaqla geniş sahələrdə fəaliyyəti olmuşdur. 16 ildən çox olan fəaliyyəti ərzində 38 fərqli layihəni idarə edən Emil Musayevin, ən son iki layihəsinin büdcəsi 30 milyon dollardan çox olmuşdur. Kriptovalyuta və blokçeyn sahəsində investisiyalar ilə bağlı yüksək təcrübəyə malikdir. Azercell, Ateshgah Insurance Group, BP, WhiteBeard Partners, Aurea Software, Ignite Technologies, Trilogy Software kimi bir çox tanınmış şirkətdə fəaliyyəti olmuşdur.
Artıq bildiyiniz kimi növbəti tədbirimiz 28 yanvar sabah.lab-da saat 13:00 etibarilə baş tutacaq. Yaxın vaxtlarda Azərbaycanda kriptovalyutaların ölkədə tənzimlənməsi ilə bağlı yeniliklər olması gözlənilir. Nəticədə, tezliklə ekosistemdə daha çox blokçeyn əsaslı layihələr formalaşmağa başlayacaq. Emil Musayev də bu mövzu istiqamətində maraqlı bir çıxış həyata keçirəcək. PMP, EMBA və blokçeyn tətbiqi tendensiyalarını (CEX, DEX, DeFi, NFT) müzakirə edib və tənzimlənmənin bu sahəyə hansı təsirlər göstərə biləcəyini, üstəlik ChatGPT-dən burada necə istifadə edildiyindən danışacağıq. “Startup Grind” tədbirimizdə iştirak etmək üçün aşağıdakı qeydiyyat linkinə daxil ola bilərsiniz. Növbəti tədbirlərimiz barədə hamıdan əvvəl məlumat sahibi olmaq üçün Instagram üzərindən bizi izləməyi unutmayın.
Startap ekosistemi xəbərlərini "İnformasiya və Rəqəmsal İnkişaf Agentliyi" ilə tərəfdaşlığımız çərçivəsində oxuyursunuz.
