“Süni intellekt, ChatGPT və OpenAI” mövzusunda Startup Grind tədbiri baş tutdu! | Nicat Zeynalov

Startup Grind Baku tərəfindən bu gün Sabah.Lab Akselerasiya Mərkəzində bu ilin ikinci görüşü baş tutdu. Ötən gün Startup Grind tədbirimizin mövzusu gündəmin ən üst pilləsində olan Süni intellekt, ChatGPT və OpenAI mövzuları ətrafında keçirildi. Görüşün əsas spikeri Nicat Zeynalov olub, bu mövzuda detallardan bəhs etdi. Hansı ki, tədbirlə bağlı ən maraqlı detallar məhz ChatGPT-nin ümumi nədən ibarət olduğu, o cümlədən Azərbaycanda necə işlədilə biləcəyi mövzusunda oldu.

Qısa olaraq Nicat Zeynalovun kim olduğundan bəhs etsək, AWS Machine Learning və Google TensorFlow Developer sertifikatlarına, o cümlədən proqnozlaşdırılmış modelləşdirməyə əsaslanan maşın öyrənmə həlləri hazırlayan 3+ illik proqramlaşdırma təcrübəsi olan maşın öyrənmə mühəndisidir. AWS Services, Python, Linux, Predictive Modeling, TensorFlow, PyTorch, NLP, Computer Vision, Model Deployment, MLOps, SQL kimi çeşidli sahələr üzrə bacarıqlara sahibdir.

Qeyd edək ki, tədbir boyunca ikinci spikerimiz isə Şahlar M. Dəmirli olmuşdur. Şahlar M. Dəmirli tədbirdə daha çox Azərbaycan daxilində ChatGPT dil modelinin necə aktivləşdirilə biləcəyi mövzusu ilə diqqət çəkmişdir. Məlumat üçün Şahlar M. Dəmirli Rəqəmsal İnkişaf və Nəqliyyat Nazirliyinin süni intellekt laboratoriyasında baş məhsul sahibidir. Bundan əvvəl SmilePay layihəsində, o cümlədən Kapital Bankda süni intellekt, söhbət botları, maşın öyrənməsi, rəqəmsal strategiyalar və.s sahələrində fəaliyyət göstərib.

Tədbirdən ən diqqət çəkən məqamlar nələr oldu?

Böyük bir ehtimalla insanları ən çox maraqlandıran suallardan biri ChatGPT süni intellekt modelinin nəyə görə Azərbaycanda işləməməsidir. İlk növbədə səthi olaraq işləməyi kənara qoyub dil modelinin Azərbaycan dilini necə dəstəklədiyindən danışmaq lazımdır. ChatGPT kimi dil modellərini müxtəlif ölkələrin dilinə uyğun inkişaf etdirmək düşündüyünüz qədər asan deyil. Çünki, başlıca olaraq ChatGPT üçün Azərbaycan dilində dataların çox az olması və xüsusilə lüğətimizdəki sözlərin Türkiyə türkcəsinə bənzərliyi dil modelində xətaların yaranmasına səbəb olur. Digər bir tərəfdən dil modellərinin öyrədilməsi üçün milyonlar xərcləmək lazımdır. Təsəvvür edin ki, superkompüterlərin kirayəsi üçün “Azure” şirkətindən 1 milyard dollar ödəndiyi kimi bir fakt mövcuddur. Nəticə etibarilə özümüz də belə bir süni intellekt əsaslı dil modelini öyrətmək bu cür bir resursa sahib deyilik.

Bu o demək deyil ki, ChatGPT süni intellekti Azərbaycan dilini dəstəkləmir. Bu süni intellekt əsaslı dil modeli ChatGPT əslinə qalsa Azərbaycan dilində yazılar hazırlaya bilir. Hətta qrammatik cəhətdən də ideala yaxın bir nəticə ortaya qoyur. Lakin ən əsas problem qrammatik cəhətdən doğru olan cümlələrin məna cəhətdən dilimizə çox da yaxın olmamasıdır. Bunun da səbəbi xüsusilə ənənəvi axtarış sistemlərindən fərqli olaraq dil modelinin cavabları özünün “yaratmasıdır”. Daha anlaşılan formada desək, axtarış sistemi sizlər üçün sırf açar sözünüzə uyğun ən ideal nəticələrin olduğu saytları ortaya çıxarır. Lakin ChatGPT kimi dil modelləri milyardlarla saytdan öyrəndiyi dataları özü müəyyən bir cümlə formasına çevirərək sizin qarşınıza çıxarır. Yəqin ki, dilimizdə də resursların nə qədər kasad olduğunu heç kim inkar etməz.

Yaxşı bəs, ChatGPT dil modeli nəyə görə Azərbaycan daxilində aktiv deyil deyə sual versəniz, buna cavab olaraq OpenAI şirkətinin bu xidmət üçün Azərbaycanı hələ hazır görməməsi səbəb göstərilir. Lakin sevinə bilərsiniz, çünki tədbir boyunca ikinci həmsöhbətimiz olan Şahlar M. Dəmirli yaxın aylarda ChatGPT süni intellektinin Azərbaycanda da aktivləşdirilməsinin şirkətin planları daxilində olduğunu bildirir. Qeyd edək ki, şirkət xidmətin aktivləşdirilməsi üçün ölkələri əvvəlcə analizdən keçirir. Tam səbəbi OpenAI şirkətinin marketinq bölməsi tərəfindən açıqlanmasa da buna özümüz müəyyən səbəblər gətirə bilərik.

Məsələn, Google Pay və Apple Pay kimi xidmətlərin aktivləşdirilməsi illər əvvəldən diqqət mərkəzində idi. Lakin siz bu xidmətləri ölkəyə gətirmək üçün şirkətlərin özü ilə əlaqəyə keçdikdə gəlib bazarınızı araşdıran şirkət çox sadə bir nümunəyə baxaraq xidməti aktivləşdirmək istəmirdi. Hansı ki, nağdsız ödənişlərin payının, əsginaslarla edilən ödənişlərin təqribi 1/4-lik hissəsini təşkil etdiyini görən şirkət təmassız ödəniş üçün öz xidmətlərini aktivləşdirməyə maliyyə sərf etməkdən yayınırdı. Lakin son illərdə nağdsız ödənişlərin güclənməsi, bazarda nağdsız ödənişlər təklif edən rəqiblərin artması avtomatik olaraq stimullaşmış bazara həmin texnoloji xidmətləri gətirdi.

Eyni hal OpenAI şirkətinin də analizlərində ümumi bucaqdan baxdıqda mövcud ola bilər. Təsəvvür edin ki, şirkət bazarı analiz edir və ölkədə süni intellekt ilə əlaqəli heç bir proses görmədikdə normal olaraq bu bazardan yayınmaq istəyir. Çünki, ən azından bazara girməklə verəcəyi və çəkəcəyi xidmətin qarşılığını ala bilməyəcəyi qənaətinə gəlir.

Nicat Zeynalovun nitqindən xüsusilə texniki baxımdan Süni intellekt və ChatGPT mövzusunda daha çox detal öyrənmək və maariflənmək istəyirsinizsə, yuxarıdakı tədbirin podkast səs yazısını dinləyə bilərsiniz. Eyni zamanda aşağıdakı video nümunəsində də elə Şahlar M. Dəmirlinin hazırladığı “Azərbaycanda ChatGPT-ni necə aktiv etmək olar?” sualına cavab tapa bilərsiniz.

Qeyd edək ki, növbəti tədbirimiz 28 yanvar sabah.lab-da saat 13:00 etibarilə baş tutacaq və mövzumuz Emil Musayev ilə olacaq. Yaxın vaxtlarda Azərbaycanda kriptovalyutaların ölkədə tənzimlənməsi ilə bağlı yeniliklər olması gözlənilir. Bu o deməkdir ki, tezliklə ekosistemdə daha çox blokçeyn əsaslı layihələr peyda olacaq. Emil Musayev PMP, EMBA və blokçeyn tətbiqi tendensiyalarını (CEX, DEX, DeFi, NFT) müzakirə edəcək və tənzimlənmənin bu sahəyə hansı təsirlər göstərə biləcəyini, həmçinin ChatGPT-dən burada necə istifadə edildiyindən danışacaq. O, 16 il ərzində 30 milyon dollardan çox büdcə ilə elə son iki ildə 38 müxtəlif layihəni idarə edib.

Startap ekosistemi xəbərlərini "İnformasiya və Rəqəmsal İnkişaf Agentliyi" ilə tərəfdaşlığımız çərçivəsində oxuyursunuz.