Dizayn dünyasının ən məşhur tətbiqlərindən biri olan Canva ilə rəqabət aparan dizayn vasitələrindən Kittl, yeni bir investisiya aldığını açıqlayıb. Kittl-in verdiyi məlumata görə, müəssisə A seriyası investisiya turunda 11,6 milyon dollar investisiya alıb. 11,6 milyon dollar dəyərində A seriyası raunduna Left Lane Capital rəhbərlik edib. İnvestisiya raundunda Left Lane Capital-dan başqa Speedinvest, Intercom-un həmtəsisçisi Des Traynor, daha əvvəl Bebo şirkətinin baş direktoru vəzifəsində çalışmış Şaan Puri və digər mələk investorlar iştirak ediblər.
Xatırladaq ki, Kittl 2021-ci ilin oktyabr ayında 1,9 milyon dollarlıq toxum sərmayəsi almışdı. 11,6 milyon dollarlıq yeni investisiya ilə Kittl-in bu günə qədər ümumi investisiyası 13,5 milyon dollara çatıb. 2020-ci ildə Berlində Nikolas Heymann və Tobias Saul tərəfindən qurulan təşəbbüs ilk dəfə Heritage Type brendi ilə ortaya çıxıb.
Toxum sərmayəsi aldıqdan sonra adını dəyişdirən və Kittl adı ilə davam edən təşəbbüs dizaynların olduqca asanlıqla yaradılmasına imkan verir. Əlavə edək ki, ödənişli abunə seçimi də mövcud olan Kittl pulsuz istifadə edilə bilir.
Kittl ilə loqolar, etiketlər, köynəklər, afişalar, kartlar və ya sosial media məzmunu üçün dizaynlar yaratmaq mümkündür. İstifadəçilərinə tez və asanlıqla dizayn etməyə imkan verən Kittl sadə və faydalı interfeysə malikdir. 2022-ci ildə istifadəyə verilən Kittl ilə indiyədək 1 milyondan çox dizayn hazırlanıb.
Kittl-in həmtəsisçisi və CEO-su Nicolas Heymann verdiyi açıqlamalarda gələcəkdə süni intellekt və maşın öyrənməsi ilə bağlı işlərini artıracaqlarını, Kittl-ə yeni həllər daxil edəcəklərini bildirib.
Startap ekosistemi xəbərlərini "İnformasiya və Rəqəmsal İnkişaf Agentliyi" ilə tərəfdaşlığımız çərçivəsində oxuyursunuz.
