Azərbaycanlı məktəbli Fidan Hüseynova dünyanın ən nüfüzlu ali məktəbi olan Massaçusets Texnologiya İnstitutuna (MIT) qəbul olub. İnformatika fənni üzrə müxtəlif milli və beynəlxalq olimpiadaların qalibi olan məktəblimiz Gəncə FRİTL-in (Fizika, riyaziyyat və informatika təmayüllü lisey) 2023-cü il məzunudur, hazırda isə İngiltərənin London Universitet Kollecində (UCL) təhsil alır.
Fidan Hüseynova 2023-cü ilin iyun ayında İnnovasiya və Rəqəmsal İnkişaf Agentliyinin həyata keçirdiyi “Technest” Təqaüd Proqramının dəstəyi ilə informatika fənni üzrə İspaniyada keçirilən beynəlxalq olimpiadalara hazırlıq kampında iştirak edib. O informatika fənni üzrə Respublika Fənn Olimpiadalarında (RFO) 4 dəfə qızıl medal və iştirak etdiyi 11 müxtəlif beynəlxalq olimpiadalar və müsabiqələrdə 1 qızıl, 2 gümüş, 3 bürünc medal və 1 həvəsləndirici mükafat alıb.
