Yadplanetlilərdən gizlənməyə çalışmaq üçün artıq çox gec olmuş ola bilər. Belə ki, Kral Astronomiya Cəmiyyəti tərəfindən dərc edilən yeni araşdırma Yerin radar sistemlərinin onilliklər ərzində kosmosa güclü siqnallar göndərdiyini ortaya çıxarıb. Bu siqnalları qabaqcıl radioteleskoplarla təchiz edilmiş istənilən sivilizasiya asanlıqla aşkar edə bilər.
Mançester Universitetindən Ramiro Saidenin rəhbərlik etdiyi tədqiqat qrupu mülki hava limanları (Heathrow, Gatwick və JFK kimi) və hərbi radar sistemlərinin yaydığı siqnalları simulyasiya edib. Onlar həmçinin bu siqnalların Barnard’s Star, HD 48948 və AU Microscopii kimi yaxınlıqdakı ulduzlardan necə görünəcəyini hesablayıblar. Nəticə aydındır: Yer radar siqnalları ilə praktiki olaraq “biz buradayıq” deyə səslənir.
1950-ci illərdən, xüsusilə də Soyuq Müharibə dövründə istifadə edilən yüksək güclü istiqamətləndirici radar sistemləri kosmosdan baxıldığında süni texnologiyanın aydın göstəricisini təmin edir. Araşdırmaya görə, mülki radarlar təxminən 2×10¹⁶ vatt, hərbi radarlar isə 1×10¹⁴ vat enerji yayır. Bu, bizi hər hansı bir radio teleskopla, xüsusən də 200 işıq ili radiusunda aşkar etməyə imkan verir. Daha güclü teleskoplarla bu məsafəni 60.000 işıq ilinə qədər uzatmaq olar. Araşdırmaya görə, Yer 20-ci əsrin əvvəllərinə qədər radio səssiz idi. Lakin 1930-cu illərdə VHF televiziyası və mikrodalğalı radar sistemlərinin inkişafı ilə Yerin “kosmik sükutu” pozuldu. NORAD erkən xəbərdarlıq sistemləri, xüsusən də Arktikada yerləşdirilmiş sistemlər planetimizi bir növ kosmik mayağa çevirib. Ramiro Saide bildirir ki, “Bizim tapıntılar onu göstərir ki, qabaqcıl texnologiyaya və mürəkkəb aviasiya sistemlərinə malik istənilən planet tərəfindən təsadüfən istehsal olunan radar siqnalları ağıllı həyatın universal əlaməti ola bilər”.
Bu inkişaf həm də illərdir müzakirə edilən əsas sualı əhəmiyyətsizləşdirir: “Biz kosmosa mesaj göndərməliyikmi?” Görünür, bu qərar bizim üçün artıq verilib. İllərdir ki, istəmədən də olsa, mesajlar göndəririk. Beləliklə, indi sual yaranır: Bu mesajlar necə qəbul ediləcək? Siqnalları qəbul edən bir sivilizasiya dinc əlaqə quracaq, yoxsa bizi məhv etməyi düşünəcəkmi?
