Böyük bir ehtimalla başlığı oxuduqdan sonra hər birinizin ağlında ilk olaraq smartfon və ya hansısa cihazın modem ilə əlaqəsi canlanacaq. Lakin qeyd etmək lazımdır ki, sözün əsl mənasında aparılan araşdırmaya əsasən Wi-Fi modemlərinin yaydığı siqnallarla insanların yerini və hətta pozisiyasını belə təyin etməyin mümkün olduğu aşkarlanıb. Bu araşdırma Carnegie Mellon universitetinin mütəxəssisləri tərəfindən həyata keçirilib. Araşdırma nəticəsinə görə Wi-Fi modemləri ilə nəinki bir insanın, hətta bir neçə insanın eyni aynda otaqdakı varlığını aşkar etmək üçün işlədilə bilər.
Tədqiqat materiallarına görə göndərilən və qəbul edilən Wi-Fi siqnalları məhz süni intellekt alqoritmləri hesabına işlənərək belə bir imkan ərsəyə gətirir
Belə ki, proses əslində çox sadə bir quruluşa malikdir. Wi-Fi modemləri ilə göndərilən və qəbul edilən siqnallar vardır. Tədqiqat boyunca məhz modemdən göndərilən Wi-Fi siqnallarının otaqdakı insanlara “təmas etdikdən” sonra geri qəbul edilməsi zamanı yaratdığı intensivlik fərqi süni intellekt ilə analiz edilib. Araşdırma zamanı isə dəyəri 32 dollar olan TP-Link Archer A7 AC1750 model router istifadə olunub.
Nəticədə Wi-Fi siqnalları hər bir halda insanın otağın hansı yerində olduğu barədə məlumat ötürməyi bacarıb. Lakin gözlənilməz olsa da insanların həmin andakı pozisiyasının belə təyin edilməsi mümkün olub. Bəzi hallarda Wi-Fi siqnalları məhz pozisiya cəhətdən insanların hansı vəziyyətdə dayandığı barədə yanlış nəticələr verib. Lakin olduğu yer barədə informasiya daim doğru təyin edilib.
Araşdırmanı aparan komanda bu kəşfdən insanların qorxması əvəzinə, sevinməli olduğunu bildirib. Onların fikrincə bu texnologiya ilə çox daha ucuz qiymətə mənzillərdə təhlükəsizlik sistemlərinin yaradılması mümkün ola bilər. Heç bir LIDAR və ya Radar tipli sensora ehtiyac qalmadan qat-qat ucuz qiymətə Wi-Fi siqnalları ilə belə bir imkanın mövcud olması innovativ bir yenilik kimi qiymətləndirilir.
Bütün bunlara baxmayaraq xüsusilə Wi-Fi siqnalları ilə insanın otaqdakı yerini aşkarlayan süni intellekt alqoritmlərinin ciddi təkmilləşməsinə ehtiyac var. Bəzi hallarda insan çox olarsa və ya araya divar kimi cismlər daxil olarsa xətalar yarana bilər.
