Yeni nəsil avtomobillərin əksəriyyətində havalandırma sistemləri olduqca adaptiv xüsusiyyətlər təklif edir. Hətta Tesla kimi elektromobillərdə əvvəlcədən təyin olunmuş vaxtlarda elektromobilin salon temperaturunun isidilib və ya soyudulması kimi rejimlər mövcuddur. Bununla belə sürücülər mobil tətbiqdən istifadə edərək avtomobilə getmədən havalandırma sistemini aktivləşdirə bilirlər. Lakin bütün bu xüsusiyyətlər yenə də işlərimizi asanlaşdırsa belə innovativ bir üsul kimi qiymətləndirilmir. Belə ki, Volkswagen şirkəti Passat modelinin mövhumi davamçısı hesab edilən elektrikli davamçısı ID 7 üçün ağıllı havalandırma sistemini təqdim edib.
Ağıllı havalandırma sisteminə sahib Volkswagen ID 7 seriyası günəşin ən çox düşdüyü tərəfi belə aktiv təyin edib o hissəni daha yaxşı soyuda biləcək
Ölkəmizdə böyük bir ehtimilla ən çox satılan elektromobillər Volkswagen ID seriyasına məxsusdur. Çünki, Bakıda hər yola çıxdıqda ən az 1 dəfə belə olsa Volkswagen ID 4 və ya Volkswagen ID 6 ilə rastlaşmaq mümkündür. İndi isə Volkswagen ID 7 seriyası CES 2023 sərgisindəki anons sonrası satışa çıxarılmağa hazırlanır. Volkswagen şirkəti də məhz ID 7 seriyasından başlayaraq elektromobillər üçün ağıllı havalandırma sistemini istifadəyə verməyə başlayacaq.
İlk növbədə Volkswagen şirkəti elektromobilləri üçün nə qədər müasir üslub formalaşdırsa da fiziki düymələrdən tam imtina etməyən şirkətlərdəndir. Görüntülərdən də gördüyünüz kimi 15 düymlük böyük ekranın altında birbaşa işıqlarla fərqləndirilmiş temperaturunu dəyişə biləcəyiniz vibrasiya əks əlaqəli fiziki hissiyatlı sensor düymələr yerləşdirilib. Lakin bu düymələr Volkswagen ID 7 seriyasında demək olar bir işə yaramayacaq. Elektromobil hava və salon daxilindəki temperaturu adaptiv şəkildə hesablayaraq havalandırma sistemini özü işə salacaq.
Havalandırma sistemi isə xüsusi dinamik kanallar hesabına isti və ya soyuq havanın elektromobil daxilində yönləndirilməsinə imkan verəcək. Beləliklə, elektromobil yayda qızmar istilərdə belə xüsusi sensor vasitəsilə günəş istiliyinin ən çox gəldiyi hissəni təyin edib o tərəfi daha yaxşı soyuda biləcək. Təbii ki, Volkswagen ID 7 seriyası ilə təklif edilən ağıllı havalandırma sistemi imkanları təkcə bundan ibarət deyil.
Elektromobil siz artıq ona yaxınlaşdığınızı təyin edərsə, avtomatik olaraq siz əyləşmədən havalandırma sistemini özü aktivləşdirib temperaturu lazımi səviyyəyə gətirməyə başlayacaq. Hətta havalandırma sisteminin özəlləşdirmələri hər bir sürücüyə görə ayrıca təyin edilə bilər.
Sonda qeyd edəcəyimiz ən maraqlı detallardan biri də “mənə soyuqdur” komandası ilə bağlıdır. Ağıllı havalandırma sistemi üşüdüyünüzü anladıqda sükan isitməsini açmaqla qalmayıb, dinamik hava kanalları ilə havanı əlinizə doğru üfləyə bilər. Bütün bu xüsusiyyətlərin yaradılmasına əsas səbəb isə enerji səmərəliliyini artırmaqdır. Elektrik istifadəsini optimallaşdırmaq istəyən Volkswagen bu imkanlarla havalandırma sistemindən lazımsız istifadənin qarşısını almaq istəyir.
