Neyrotexnoloji startap Synchron tərəfindən hazırlanmış beyin-kompüter interfeysi (BCI) implantı sayəsində xəstələr öz düşüncələri ilə Apple Vision Pro istifadə edə bilərlər. Belə ki, Elon Musk-ın Neuralink şirkətinin rəqibi olan neyrotexnoloji startap Synchron adından söz etdirməyə davam edir.
Şirkətdən verilən açıqlamada şirkətin hazırladığı implant vasitəsilə Apple-ın Vision Pro qulaqlığı ilə əlaqə qurulduğu açıqlanıb. Artıq fiziki hərəkəti məhdud olan xəstələrin yalnız düşüncələrindən istifadə edərək cihazı idarə etməsi mümkün olub. Synchron, iflic olan xəstələrin smartfon və kompüter kimi texnologiyaları ağılları ilə idarə etməyə kömək etmək üçün nəzərdə tutulmuş beyin-kompüter interfeysi və ya BCI hazırlayır. Şirkət hazırladığı cihazı artıq cəmi 10 xəstəyə implantasiya edib. Bununla belə, kommersiya istifadəsi üçün hələ də FDA təsdiqinə ehtiyacı var.
Şirkət yeni açıqlamasında Apple-ın bu ilin əvvəlində təqdim etdiyi və ümumiyyətlə göz hərəkətləri, səs əmrləri və əl hərəkətləri ilə istifadəçilər tərəfindən idarə olunan Vision Pro-nun indi öz implantını taxan insanlar tərəfindən sadəcə düşünərək istifadə edilə biləcəyini açıqlayıb. Synchron bildirir ki, onlar bu texnologiyanı danışa bilməyən və ya yuxarı ətraflarını hərəkət etdirə bilməyən xəstələr üçün əlçatan edəcəklər. Bununla belə, şirkət yalnız Vision Pro ilə məhdudlaşmayacaq və digər başlıqlar üzərində də işləyəcək. Neuralink-dən fərqli olaraq, Synchron tərəfindən hazırlanmış BCI birbaşa beyin əməliyyatı ilə deyil, xəstənin yuxu arteriyası vasitəsilə yerləşdirilir.
