Daim dünyadakı ilkləri reallaşdıran Səudiyyə Ərəbistanında bu dəfə dünyanın ilk 500 milyon dollarlıq e-sport şəhəri inşa ediləcək. Görünən odur ki, Səudiyyə Ərəbistanı adında “sport” olan hər yeri ələ almaq istəyir. Bu barədə ölkənin ən böyük kapital şirkətlərindən biri olan Saudi Arabia şirkətinin baş icraçı direktoru Mohammed AlQahtani xəbər verib. Yeni e-sport şəhərinin dünyanın hər yerindən böyük e-sports komandalarını və oyunçularını cəlb edəcəyi gözlənilir. Həmçinin 500 milyon dollarlıq yeni şəhərdə yeni istedadların yetişməsi və rəqabət aparılması üçün müxtəlif platformalar mövcud olacaq.
Ümumiyyətlə son dövrlərin ən çox inkişaf edən sahələrindən biri olan e-sport üçün Səudiyyə Ərəbistanında bu cür imkanın yaradılması gələcəkdə bu şəhərin e-sport mərkəzi olmasına imkan verə bilər. Həmçinin dünyanın ən çox tamaşaçılı e-sport rəqabətləri də bu şəhərdə aparılacaq. Belə ki, Səudiyyə Ərəbistanında inşa ediləcək yeni e-sport şəhəri 20 min nəfərlik böyük arenalara da sahib olacaq. Hətta yeni şəhərdə dünyanın ən böyük e-sport turnirlərindən biri olan World Cyber Games də daxil olmaqla bir çox tədbirlər keçiriləcək.
Qeyd edək ki, tam olaraq Ər-Riyadın daxilində salınaraq 500 milyon dollarlıq büdcə ilə inşa ediləcək şəhərin sadəcə növbəti ilə qədər tamamlanması planlaşdırılır. Lakin şəhərdə 2030-cu ilə qədər 35 fərqli arenanın inşa edilməsi planlaşdırılır. Əslində bu yenilik gələcəkdə krallığa böyük iqtisadi mənfəət gətirəcək. Çünki, dünyanın hər bir yanından milyonlarla turist məhz bu şəhərdə keçiriləcək oyunları izləmək üçün ölkəyə gələcək.
