Bu gün Paris məhkəməsi Pavel Durova qarşı ittiham irəli sürüb və Telegram-ın təsisçisinin məhkəmə nəzarətinə götürülməsinə qərar verib. Belə ki, Pavel Durov məhkəmənin qərarı ilə 5 milyon avro girov müqabilində sərbəst buraxılıb və onun Fransa xaricinə səyahət etməsi qadağan edilib.
Pavel Durov çərşənbə günü məhkəmə iclasından əvvəl həbsdən azad edilib. Məhkəmədə dindirildikdən sonra ona ittiham elan edilərək nəzarətə götürülüb. Durova Fransa ərazisini tərk etmək qadağan edilib və həftədə iki dəfə polis idarəsinə məlumat verməsi zəruri hesab olunub. Paris prokurorluğunun bəyanatında deyilir ki, “Pavel Durov məhkəmə nəzarətinə götürülüb, xüsusən beş milyon avroluq girov tələbi, həftədə iki dəfə polis bölməsinə xəbər vermək öhdəliyi və Fransa ərazisini tərk etmək qadağandır”. Qeyd edək ki, Durov 6 cinayət üzrə ittiham edilirdi.
Belə ki, bu cinayətlərə aşağıdakılar aiddir:
Qeyri-qanuni əməliyyatların təmin edilməsində iştirak;
Pornoqrafik xarakterli materiallara, o cümlədən yetkinlik yaşına çatmayanlara sahib olmaqda iştirakçılıq;
narkotik vasitələrin qanunsuz dövriyyəsində iştirak;
Fırıldaqçılıqda iştirak;
kriptoloji xidmətlərin göstərilməsi;
İttihama görə, Durovu 10 ilə qədər həbs cəzası gözləyirdi. Daha əvvəl onun 12 cinayətdə iştirak etdiyi irəli sürülmüşdü. Hətta bəzi mənbələr bu cinayətlərin cəzası olaraq onu 20 ilə qədər həbs cəzası gözlədiyini elan etmişdi. Xatırladaq ki, Pavel Durov ötən şənbə, avqustun 24-də Fransaya gələn kimi saxlanılıb və bu günə kimi həbs olunmuşdu. Paris prokurorluğu həmçinin bildirib ki, Fransa hüquq-mühafizə orqanları bu ilin fevralında “məhkəmə sorğularına demək olar ki, tam cavab verilməməsi” səbəbindən Telegram-a qarşı ilkin istintaqa başlayıb. Əvvəllər xəbər verildiyi kimi, biznesmen Telegram-ın moderasiyasının olmaması səbəbindən Fransa hüquq-mühafizə orqanlarının hədəfinə çevrilib. Fransada Telegram platforması cinayətkarlar arasında çox populyarlaşıb və hüquq-mühafizə orqanlarının məlumatına görə, Telegram rəhbərliyi bununla bağlı heç bir addım atmayıb və hökumət ilə əməkdaşlıqdan da imtina edib.
