NASA Kosmik Stansiyada astronavtların kostyumlarında yaranan problemə görə narahat olub. Belə ki, NASA astronavtı alman Matthias Josef Maurer boğulma təhlükəsi yaşayıb. Kosmik agentliyin rəsmiləri bildiriblər ki, onun mart ayında kosmosda gəzinti üçün geyindiyi dəbilqəsinə su dolub. Martın 23-də son kosmos yürüşünün sonunda Matthias Josef Maurer-ə kosmos geyimini çıxarmaqda kömək edən başqa bir astronavt Kayla Barron dəbilqənin içərisində su aşkar edib. Dəbilqə çıxarıldıqdan sonra komanda, Günəşin zərərli şüalarından qoruyan sipərin su ilə örtüldüyünü müəyyən edib. Bundan əlavə, dəbilqənin arxasındakı absorbent yastığı da nəm olub. Qeyd edək ki, Matthias Josef Maurer 18 mart 1970-ci ildə anadan olub. 2015-ci ildə kosmos təlimində iştirak etmək üçün seçilmiş Alman Avropa Kosmik Agentliyinin astronavtı və eyni zamanda da materialşünasıdır.
Bu problem astronavtların boğulmasına səbəb ola bilir
Sudan qorunmaq üçün nəzərdə tutulmuş bu yastıqlar 2013-cü ildən təqdim edilib. Üstəlik həmin tarixdə də bir astronavtın dəbilqəsinə su dolmuşdu. Avropa Kosmik Agentliyinin astronavtı Luca Parmitano bu səbəbdən kosmos səyahətini erkən bitirmişdi. Luca Parmitano gözünü, qulaqlarını və burnunu örtən su ilə mübarizə apararaq əsl boğulma təhlükəsi yaşamışdı. NASA astronavtı Maurer, Luca Parmitano ilə eyni təhlükəni yaşamasa da gəzinti zamanı onun da dəbilqəsi su ilə dolub.
NASA astronavt yürüşlərini təxirə saldı
Problemə görə təcili olmayan bütün kosmos yürüşləri təxirə salındı. Johnson Kosmik Mərkəzində kosmik stansiya proqramının direktor müavini Dana J. Weigel, “Sonuncu kosmos gəzintisindəki kostyum probleminin səbəblərini daha yaxşı başa düşməyənə qədər kosmos gəzintilərinə çıxmayacağıq” dedi. Bundan başqa səlahiyyətlilər Matthias Josef Maurer-in kostyumunun iyul ayında BKS-dan qayıtması planlaşdırılan SpaceX-in Dragon kapsuluna yerləşdirməyə qərar veriblər. Beləliklə, NASA astronavtı Matthias Maurer-in kostyumunu araşdıraraq problemin mənbəyini tapmağı planlaşdırırlar. Dana J. Weigel-in sözlərinə görə, ilkin aparılan araşdırmalarda indiyə kimi “qeyri-adi heç nə” aşkar edilməyib.
Xatırladaq ki, NASA-nın CineSpace qısametrajlı film müsabiqəsi üçün müraciətlər hələ də davam edir. 26.000 $ təklif edilən bu qısa metrajlı film müsabiqəsi haqqında ətraflı məlumata saytımızdan ziyarət edə bilərsiniz.
