Az qala hər həftə Dimensity 8100 çipsetinə sahib fərqli bir smartfon satışa çıxarılır. Üstəlik çıxarılmış bu smartfonların hər biri müxtəlif məqsədlərə xitab edirlər. Mediatek o qədər ideal performans və qiymət səviyyəsi tapıb ki, istehsalçılar bu çipsetlə çeşidliliyi çox yaxşı artıra bilirlər. Lakin OPPO Reno 8 seriyası üçün əhəmiyyətli olan yenilik Dimensity 8100 çipsetindən ibarət deyil . Çünki, Reno 8 seriyası bir neçə gün əvvəl təqdim edilmiş Snapdragon 7 Gen 1 çipsetini əldə etmiş ilk modelə sahiblik edir. Ayrı-ayrı baxsaq Reno 8 seriyası daxilində bizi 3 model gözləyir. Bunlar Reno 8, Reno 8 Pro və Reno 8 Pro+ modelləridir. Reno 8 Pro və Reno 8 Pro+ modelləri müəyyən oxşarlıqlara sahib olsa da Reno 8 digər 2 modeldən xeyli fərqlənir.
Smartfonların dizaynı necə alınıb?
Smarfonların dizaynından danışmağa Reno 8 Pro və Reno 8 Pro+ modelləri ilə başlayaq. Cihazlar gövdənin quruluşuna görə bənzərdirlər. Gövdənin kəskin kənarları erqonomik şəkildə arxa kamera moduluna doğru uzanaraq çıxıntı yaradır. Dizayn ilk baxışdan OnePlus Nord CE 2 modelini xatırladır. Bənzərlik olmasına baxmayaraq OPPO dizaynerlərini çıxardığı işə görə təbrik etmək lazımdır. Smartfonun dizaynı diqqətləri öz üzərinə çəkməyi bacarır. OPPO Reno 8 Pro+ modelinin kamera modulu aşağı doğru daha çox uzanır. Beləcə kamera modulu Reno 8 Pro ilə müqayisədə daha böyük görünür. Vizual olaraq daha güclü hissiyatı yaratsa da iki cihazın da kamera xüsusiyyətləri demək olar eynidir. Ön tərəfdən baxdıqda isə fərq daha aydın başa düşülür. Reno 8 Pro+ modelinin ekran çərçivələri daha nazikdir və selfi kamerası mərkəzə alınıb. Reno 8 Pro modelində çərçivələr cüzi daha qalındır və selfi kamerası ekranın sol üst hissəsinə yerləşdirilib. Reno 8 isə dizayn anlayışına görə digər 2 modelə bənzəyir, ancaq görünüşü giriş səviyyəsi cihazlara daha çox oxşayır.
Reno 8 Pro+
OPPO Reno 8 Pro+ modeli öz gücünü Dimensity 8100 çipsetindən alır. OPPO şirkəti bu çipseti Dimensity 8100 Max olaraq adlandırır. Lakin Max uzantısı çipset üzərində süni intellekt özəllişdirmələri olduğunu göstərir. Performansa bir təsiri yoxdur. OPPO bu modelə əlavə olaraq özünə məxsus olan MariSilicon X çipi (NPU) də yerləşdirib. Sistem və ya kamera performansına bu çip yüksək emal gücü sayəsində yaxşı təsir göstərə bilər.
Smartfona 6.7 düym ölçülü 120Hz tezlikli AMOLED ekran quraşdırılıb. FHD+ təsvir ölçülü ekranın 360Hz sensor tezliyinə malikdir. P3 rəng qamutu, 10bit rəng dərinliyi, sRGB kimi detallara sahib bu ekran Gorilla Glass 5 ilə qorunur.
Kamera parametrlərinə gəldikdə 1/1.57 düymlük avtofokus dəstəkli Sony IMX 766 50MP əsas, 8MP 112° ultra-geniş bucaqlı, 2MP makro sensorları arxa tərəfdə mövcuddur. Ön tərəfdə 32MP təsvir ölçülü Sony IMX 709 sensoru işlədilib. Təəssüf ki, nə arxa kamerasında 4K/60FPS, nə də selfi kamerasında 1080P/60FPS video qeyd dəstəyi mövcud deyil.
İki hüceyrəli 4500mAh batareyası 80W SuperVOOC şarj dəstəkləyir. LPDDR 5 yaddaş və UFS 3.1 operativ yaddaş çipləri ilə təchiz edilib. Barmaq izi sensoru ekranın altına yerləşdirilib. Android 12 üzərinə Color OS 12.1 ilə qutudan çıxır.
Reno 8 Pro
OPPO Reno 8 Pro modeli isə Snapdragon 7 Gen 1 çipseti ilə təchiz edilib. Snapdragon 7 Gen 1 çipsetinə sahib ilk smartfondur. Performansına növbəti məqalələrimizdən birində Snapdragon 8+ Gen 1 ilə birlikdə nəzər salarıq. Amma Dimensity 8100 çipsetindən biraz geri qaldığı məlumdur.
6.62 düymlük 120Hz tezlikli AMOLED ekran paneli əldə edib. FHD+ təsvir ölçülü ekran 360Hz sensor tezliyinə sahibdir. Reno 8 Pro+ kimi ekranı Gorilla Glass 5 ilə qorunan bu model bənzər keyfiyyət standartlarını üst modellə bölüşür.
Kamera cəhətdən tək fərq ultra-geniş bucaqlı kameradadır. Üst modellə eyni 8MP kameranın baxış bucağı 120°-dir. Yəni Reno 8 Pro+ modelindən 8° daha böyükdür. Yerdə qalan hər şey eyni qalıb.
Qeyd edək ki, bu modeldə də MariSilicon X çipi işlədilib. 4500mAh batareyası üst variantındakı kimi iki hüceyrəlidir və 80W sürətli doldurma edə bilir.
Reno 8
OPPO Reno 8 modeli barədə çox uzun danışmayacağıq. Dimensity 1300 çipseti quraşdırılan smartfonun performansı xeyli yüksəkdir. Amma ekranın çənə hissəsinin qalın olması alıcını biraz soyudan amillərdəndir. 6.43 düym ölçülü AMOLED ekran panelinin tezliyi 90Hz-dir.
Kamera parametrləri Reno 8 modelində fərqlidir. Naməlum istehsalçıya aid 1/1.55 düym ölçülü 50MP sensor əldə edib. Ultra-geniş bucaqlı kamerası 2MP monoxrom kamera ilə əvəzlənib. Yerdə qalan 2MP makro və 32MP selfi kameraları, batareya xüsusiyyətləri yenə üst modellərlə eynidir.
Smartfonların qiymətinə gəldikdə Reno 8 modeli 375$, Reno 8 Pro modeli 450$, Reno 8 Pro+ modeli 555$ başlanğıc qiymətdən Çində təklif edilir. OPPO Reno 8 seriyası iyun ayından etibarən satışda olacaq.
