Instagram tətbiqi bir neçə gün əvvəl öz loqotipini yeniləməklə gündəmə gəlmişdi. Bu dəyişiklik yalın gözlə çox məlum olmasa da keyfiyyətli ekranda diqqətlə baxdıqda görülürdü. Dəyişiklik nədən ibarət idi deyə soruşsanız, şirkət sadəcə loqotipin parlaqlığını artırmışdı. Nəticədə rənglər daha canlı görünürdü. Bu balaca dəyişikliyin ardından bundan qat-qat daha əhəmiyyətli bir yenilik artıq yoldadır. Söhbət Instagram-ın təqdim etdiyi yeni şrift dizaynından gedir. İnsanlar nə ilə qarşılıqlı əlaqədədirlərsə hər zaman həmin şeyi özünəməxsus xüsusiyyəti ilə tanıyır. Tətbiqlər üçün də dizaynın yadda qalan və cəlbedici olması vacibdir. Instagram Sans şrift paketi tam olaraq buna xidmət edir. Möhtəşəm dizayna malik və hər bir xırdalığı düşünülərək hazırlanmış yenilik artıq təsdiqlənib.
Instagram Sans hazırlanarkən hər bir detal nəzərə alınıb!
Bir şrift yaradılarkən ən lazımi məqam bütün dillərdə şriftin dəstəklənməsidir. Əks halda çəkilən əziyyətin heç bir mənası olmur. Instagram Sans ailəsinə daxil olan şriftlər məhz bu arqument nəzərə alınaraq hazırlanılıb. Dilçilərlə bir yerdə işləyən Instagram komandası hər bir dildə şriftlərin dəstəklənməsi məqsədilə iş görüb. Yapon dilindən Ərəb dilinə qədər müxtəlif peşəkarlarla məsləhətləşən şirkət hərflərin doğru göründüyündən əmin olub. Ümid edirdik ki, Azərbaycan dilindəki bəzi “ə,ü,ö” tipli hərflərlə bağlı problem yaşamarıq. Çünki, tanınmış şriftlərdə belə bəzən əlifbamızdakı hərflərin bəzilərinin dəstəklənmədiyini görürük. Lakin deyəsən şriftlərin Azərbaycan dilində dəstəklənməsində hələlik bəzi problemlər var.
Instagram Sans şriftlərinin dizaynı barədə şriftlərin dizaynının çox qəribə olduğunu qeyd etməliyik. Tətbiqin loqotip dizaynını xatırlayırsınızsa uc nöqtələri yuvarlaqlaşdırılmış kvadrat formaya malikdir. Şirkət buna kvadart (squares) və dairə (circles) sözlərinin birləşməsindən əmələ gələn squircles adını verir. Şirftlər isə həmin squircles anlayışından ilhamlanaraq hazırlanılıb. Sans paketi daxilində Sans Regular, Sans Headline Regular, Sans Condensed Regular şəklində çeşidlərə ayrılır. Sans Headline Regular şrifti xüsusi detalları ilə fərqlənir. Sadə Sans Regular ilə Azərbaycan sözünü yazdıqda heç bir problem görünmür. Lakin Sans Headline Regular ilə uyğun gələn şriftlərlə Azərbaycan yazdıqda “ə” hərfinin yazı ilə uyğun gəlmədiyi müşahidə edilir. Yəqin ki, bu hal test edərkən yalnız latın əlifbasındakı hərflərin dəstəklənməsindən qaynaqlanır. Tətbiq daxilində istifadəyə verildikdə problemin həll edilməsi mümkündür.
Təqdim edilən şriftləri istər hekayələr hissəsində, istəsəniz Reels bölməsində istifadə edə biləcəksiniz. Hansısa məzmun üzərinə Instagram Sans ilə yazı yazdığınız zaman paylaşımın sırf bu platformadan olduğu anlaşılacaq. Şirkətin əsas hədəfi TikTok videoları ilə yaranan qarışıqlığın qarşısını almaqdır.
