Ötən günlərdə Xiaomi şirkətinin keçirdiyi təqdimat tədbiri zamanı maraqlı anlar yaşanıb. Belə ki, yeni Xiaomi 13 seriyası smartfonlarını təqdim edən şirkətin CEO-su Lei Jun iPhone istifadə etməsinin səbəbini açıqlayıb. Qeyd edək ki, Xiaominin qurucusu və CEO-su 1 ildən çoxdur ki, iPhone smartfonundan istifadə etdiyi üçün tənqid olunurdu. Hətta bəzi sosial şəbəkə istifadəçiləri onun bu hərəkətini lağa qoyurdu. Lakin Lei Jun nəhayət bu tənqidlərə son qoymaq qərarına gələrək, mübahisəyə açıqlıq gətirib.
Lei Jun iPhone istifadə etməsinin səbəbini izah edib
Çin texnologiya nəhənginin qurucusu və icraçı direktoru olan Lei Jun, Xiaomi 13 seriyası smartfonlarının təqdimatının mətbuat konfransı zamanı jurnalistin verdiyi sualı cavablayıb. Şirkətin CEO-su açıqlamasında bildirib ki, o Apple şirkətinin iPhone smartfonları ilə rəqabət apara bilən və müqayisə edilə bilən smartfonları hazırlamaq üçün belə üsula əl atıb. Həmçinin o, Apple şirkətinin iPhone smartfonlarının texniki və proqram təminatı cəhətdən Xiaomi smartfonlarından üstünlüklərini qeyd edərək, “Bu, bizim üçün gələcəkdə iPhone-u keçmək fürsətinin başlanğıcıdır” deyə bildirib.
Bundan əlavə isə, Xiaomi şirkətinin qurucusu olan Lei Jun yeni Xiaomi 13 seriyasının smartfonlarının iPhone 14 seriyasının smartfonları ilə rəqabət aparacağını bildirib. Belə ki, şirkətin qurucusu smartfonlarını müqayisə edib. O bildirib ki, Xiaomi 13 Pro smartfonu Xiaomi və Sony tərəfindən birgə hazırlanmış 50MP Sony IMX989 kamera sensorundan istifadə etsə də, iPhone 14 Pro Max smartfonu 48MP kamera sensoruna malikdir. Qeyd edək ki, Xiaomi 13 və Xiaomi 13 Pro smartfonlarının satışı Çində ötən gün başlayıb.
