Motorola şirkəti bu gün Çində flaqman “X” seriyasının yeni nümayəndəsi olan Moto X40 modelini anons edib. Münasib qiymətə ən yüksək performansı verən cihazlara təqdim etməsi ilə tanınan Motorola X seriyası, yenə də olduqca maraqlı bir modellə qarşımıza çıxıb. Premium dizaynı və flaqmana cihazlara yaxın xüsusiyyətləri ilə fərqlənən Motorola X40 modeli münasib qiyməti ilə diqqət çəkib. Smartfonun arxa tərəfində standart olaraq mərkəzə yerləşdirilmiş Motorola loqotipi, sol üst hissədə isə kvadrat kamera modulu yerləşdirilib. Ön tərəfdə isə qıvrımlı ekran paneli smartfona flaqman səviyyəsi hissiyat qatıb.
Motorola X40 modeli nə vəd edir?
Smartfon öz gücünü sektorun ən güclü çipseti olan Snapdragon 8 Gen 2 çipsetindən alır. Motorola brendi Moto X40 modelinə 3.002 mm² ölçülü 11 qatlı soyutma sistemi quraşdırdığını bildirib. Əslinə qalsa Motorola brendi Lenovo şirkətinə aid olduğundan oyun smartfonlarındakı mühəndislik nümunələrinin müəyyən bir qismi bu kimi cihazlara ötürülə bilir. Ona görə də performans və performans davamlılığı baxımından Motorola X40 modelinin yaxşı nəticə göstərməsi təəccüblü deyil. Digər bir tərəfdən bu smartfonda LPDDR5X operativ yaddaş və UFS 4.0 yaddaş texnologiyaları işlədilib.
Moto X40 modelində 6.7 düymlük FHD+ təsvir ölçülü tam olaraq 165Hz OLED ekran paneli quraşdırılıb. 10 bitlik ekran paneli yüksək tezlikli PWM texnologiyasını dəstəkləyir və SGS göz sağlamlığı sertifikatına malikdir. Motorola şirkəti barmaq izi sensorunu da ekranın altına yerləşdirərək premium cihaz hissiyatını maksimum səviyyəyə çıxarmağa çalışıb. Qeyd edək ki, ekran Gorilla Glass Victus ilə qorunur.
Mövzu kamera parametrlərinə gəldikdə Motorola X40 modelinə 1/1.56 düymlük 50MP təsvir ölçülü kamera sensoru quraşdırılıb və OIS ilə gücləndirilib. Əsas kameranın yanında isə 50MP təsvir ölçülü 117° ultra-geniş bucaqlı kamera quraşdırılıb. Üçüncü kamera isə 12MP təsvir ölçülü 2 qat optik yaxınlaşdırmalı portret kamerasıdır. Motorola şirkəti bu smartfona 60MP təsvir ölçülü selfi kamerası da quraşdırıb ki, selfi çəkilişləri də həmçinin olduqca keyfiyyətli olmalıdır.
4600 mAs batareyaya sahib smartfon 125 Vatt sürətli şarj dəstəkləyir. 15 vatt tərs şarj imkanı mövcuddur. Nə qədər münasib qiymətli də olsa Motorola bu cihazı IP68 sertifikatı ilə suya və toza qarşı dayanıqlı hazırlayıb. Gövdəsi alüminium materialdan olan cihazın arxasında Gorilla Glass Victus şüşə qapaq istifadə olunub.
Motorola X40 modelinin qiyməti
Smartfon Çində 8-128GB versiyası üçün 490 dollardan başlayan qiymət etiketi ilə təklif olunur. Qiyməti nəzərən xüsusiyyətləri fikrimizcə çox yaxşı görünür. Qlobal bazara nə vaxt təqdim ediləcəyi isə naməlumdur. Lakin cihazı əldə etmək istəyənlər yaxın həftələrdə onlayn olaraq Aliexpress üzərindən cihazı onlayn sifarişlə təmin edə biləcəkdirlər.
