Adı açıqlanmayan bir investor uzun müddət su altında yaşaya biləcək modul strukturlar hazırlamaq və ya sualtı şəhər tikmək üçün milyonlarla dollar sərmayə qoyub. Belə ki, Uels sərhədində hələlik kim olduğu bilinməyən bir investor tərəfindən maliyyələşdirilən Deep layihəsi okeanın dibində daimi insan məskənləri yaratmaq məqsədi daşıyır.
Məlum olub ki, layihə çərçivəsində uzun müddət su altında yaşamaq üçün uyğun modul strukturlar hazırlanacaq. Hazırda isə Deep komandası 2027-ci ilə qədər su altında daimi yaşayış sahələri yaratmaq üçün işlərini davam etdirir. İngiltərənin Qlosterşir regiondundakı keçmiş karxanada inşa edilən obyektdə gözətçi adlanan xüsusi sualtı kapsullar hazırlanır. Bu kapsulların 200 metr dərinliyə endirilə biləcəyi və insanların 28 günə qədər yerləşdirilməsi üçün nəzərdə tutulduğu öyrənilib. Bildirilib ki, Sentinel bölmələri ilkin olaraq 28 gün su altında qalmağa hesablanıb, lakin əsas məqsəd bu müddəti aylara, hətta illərə qədər uzatmaqdır.
Habelə, layihə rəsmilərinin sözlərinə görə, uzunmüddətli perspektivdə bu sistem dünya okeanlarında daimi insan koloniyalarının əsasını təşkil edə bilər. Gizli investor tərəfindən maliyələşdirilən bu layihənin dəyəri isə 100 milyon dolları ötəcək. Su altında tikiləcək konstruksiyalar təkcə alimlərin deyil, kifayət qədər maddi imkanı olan hər kəsin istifadəsinə veriləcək. Bildirilib ki, Deep tərəfindən hazırlanan kapsullar sualtı təzyiqə davamlı xüsusi poladdan hazırlanacaq. Təhlükəsizlik testlərinin beynəlxalq standartları müəyyən edən müstəqil Det Norske Veritas (DNV) təşkilatı tərəfindən aparıldığı paylaşılıb. Jacques Cousteau-nun keçmişdə həyata keçirdiyi sualtı həyat layihələri ilə oxşarlıqlar daşıyan bu təşəbbüsün daha uzun müddətli yaşayış sahəsi yaratmağı hədəflədiyi bildirilib.
