İsveçrənin “Stadler” şirkəti tərəfindən istehsal edilən hidrogenlə işləyən qatar bir çənlə dayanmadan 2803 km qət edərək Ginnesin Rekordlar kitabına düşüb. Qeyd edək ki, bu nailiyyət ABŞ-ın Kolorado ştatında xüsusi halqa sınaq trekində əldə edilib. Ümumiyyətlə, elektrik qatarları uzun müddətdir həyatımıza daxil olsa da, hava elektrik xətləri kimi əlavə infrastruktur tələb edir. Bu isə bəzən qatar yolu inşa edilməsi zamanı əlavə xərclərin yaranmasına səbəb olur. Yeni alternativ enerji ilə işləyən qatar isə əlavə infrastruktur sərmayəsinə ehtiyac olmadan işləyə bilir.
Stadler şirkətinin istehsalı olan FLIRT-H2 adlı və hidrogenlə işləyən qatar, 2 minik vaqonu və güc blokuna sahibdir. Çəndə saxlanılan hidrogen, yanacaq elementi ilə elektrik enerjisinə çevrilir. Daha sonra elektrik dartma çeviricisinə göndərilir və qatarı hərəkət etdirmək üçün elektrik sürücüsünü qidalandıran batareyada saxlanılır. Sistem həmçinin regenerativ əyləc vasitəsilə enerjinin bərpasına imkan verir. İki vaqonlu qatar 108 sərnişin tutumuna malikdir və 130 km/saat sürətə çata bilir.
Bundan əlavə, qatar 49 dərəcə Selsi kimi yüksək mühit temperaturlarında da işləyə bilər. Həmçinin FLIRT-H2, San Bernardino Nəqliyyat İdarəsi (SBCTA) üçün istehsal edilmişdir. Bütün günü yanacaq doldurmadan işləyə bilən qatar bu ilin sonunda xidmətə başlamazdan əvvəl Koloradoda sınaqdan keçirilib. Standler qatarının uzun müddət işləyə biləcəyini göstərmək üçün rekord cəhdi martın 20-də axşam start götürüb. Stadler mühəndisləri qatarı bütün gecə və ertəsi gün növbə ilə idarə ediblər. Martın 22-də saat 17:23-də qatar dayananda bir yanacaq çəni ilə 46 saatda 2803 km yol qət etməyi bacarmışdı.
Bu dəyər FLIRT H2-nin elan edilmiş 460 km məsafəsindən xeyli yuxarıdır. Rekord cəhdi zamanı qatar dayanıb getmədiyi və müxtəlif mailliklərdə hərəkət etmədiyi üçün real həyatda bu diapazona çatmaq mümkün deyil. Yenə də bu rekordu hidrogen əsaslı qatarların qabiliyyətini nümayiş etdirir və onların gələcəkdə istifadə oluna biləcəyini bildirir.
