Günümüzün ən böyük problemlərindən biri olan enerji üçün alimlər yeniliklər axtarmağa davam edir. Belə ki, indi günəş panellərindən daha çox enerji və su istehsal edən günəş yarpağı hazırlanıb. London İmperial Kollecinin tədqiqatçıları fotovoltaik günəş enerjisini yığan və istehsal edən, o cümlədən bitkilərin fotosintez prosesinə oxşar olaraq şirin su istehsal edən yeni yarpaq dizaynında enerji texnologiyası hazırlayıblar. Bildiyimiz kimi, fotovoltaik günəş enerjisi günəş şüalarının elektrik enerjisinə çevrilməsi ilə əldə edilir. Hazırda ən əsas alternativ enerji mənbələrindən olan günəş panelləri bu enerjini istehsal edir.
Hazırda mövcud olan günəş panellərinin səmərəliliyi az olsa da, yeni günəş yarpağı özünəməxsus dizaynı ilə bu göstəricini artıra bilib. Həmçinin yeni texnologiya ucuz materiallardan hazırlanır. Həmçinin tədqiqatçılar bu texnologiyanın gələcəkdə bir çox yeniliyə ilham verəcəyini düşünür. Maraqlısı budur ki, yeni enerji texnologiyası, qəbul edilən günəş enerjisinin 70%-ni itirən günəş panellərinə nəzərən 10% daha çox enerji istehsal edir. Tədqiqatçıların fikrincə yeni yarpaq dizaynlı enerji texnologiyası səmərəli istifadə olunarsa, 2050-ci ilə qədər 40 milyard kubmetrdən çox şirin su istehsal edə bilər.
Ümumiyyətlə deyə bilərik ki, yeni Günəş yarpağı texnologiyası daha ucuz materiallardan hazırlandığı üçün nasos, ventilyator, kontroller və digər bahalı materiallara olan ehtiyacı aradan qaldırır. Həmçinin eyni anda həm enerji, həm də su istehsal edərək daha səmərəli fəaliyyət göstərir. Gələcəkdə bu texnologiya hazırda istifadə olunan günəş panellərini əvəzləyərsə, ciddi dərəcədə enerji və su problemi azalar.
