Apple şirkətinin ekosistemində yer alan cihazların uzaqdan aşkar edilməsi üçün təqdim etdiyi Find My texnologiyası əksər hallarda istifadəçiləri qiymətli əşyalarının itməsinin qarşısını alır. Bu dəfə isə ABŞ-da Connecticut ştatında yarım milyon dollar dəyərində olan oğurlanmış Ferrari AirPods sayəsində tapılıb. Qeyd edək ki, 2023-ci ildə təqdim edilən bu lüks idman avtomobilinin hazırkı dəyəri 575 min dollar təşkil edir.
Connecticut ştatında yaşanan bu hadisədə naməlum şəxs, Ferrari markalı avtomobili oğurlamağı bacarıb. Digər tərəfdən, o, avtomobilin içərisindəki AirPods qulaqlığına da toxunmayıb. Vəziyyət belə olduqda isə Apple şirkətinin Find My funksiyası işə düşüb. Bu funksiya sayəsində isə avtomobil sahibi və polis lüks avtomobili anbaan izləyə bilib. Polisin hadisə ilə bağlı verdiyi məlumata görə, Ferrari Greenwich adlanan ərazidə oğurlanıb. Daha sonra isə polis oğurlanmış avtomobilin yerini tapıb və onu dayandırmağı bacarıb. Hətta avtomobili dayandırmağa məcbur olan şəxs avtomobili tərk edərək qaçıv və gözdən itib.
Təxminən 1 milyon manat dəyərində olan lüks avtomobil sadəcə bir neçə yüz manat qiyməti olan AirPods modeli vasitəsi ilə oğurlandıqdan sonra tapılıb. Başqa bir tərəfdən baxsaq, əslində bu hadisədən sonra bəzi təcrübələr də əldə etmək olar. Avtomobilləri, xüsusilə lüks avtomobilləri daha da qorumaq və ya oğurlandıqdan sonra dərhal tapa bilmək üçün AirTag tipli texnologiyalardan istifadə etmək bəzən çox əhəmiyyətli ola bilər.
