Yaponlar bu dəfə, dünyanın ilk bitki mənşəli yarış mühərrik yağını təqdim ediblər. Belə ki, yağın 80%-dən çoxu bitki mənşəli materiallardan hazırlanıb. Maraqlısı budur ki, ekoloji olaraq təmiz hesab olunan bu mühərrik yağı digərlərinə nəzərən 194% daha çox möhkəmlik təklif edir.
Yaponiyada hazırlanan dünyanın ilk bitki mənşəli yarış mühərrik yağı, unikal və ekoloji cəhətdən təmiz formuluna görə yarış dünyasında hər kəsi heyran edib. Qeyd edək ki, bu mühərrik yağının tərkibinin 80%-dən çoxu bitki mənşəli materiallara əsaslanır. Bu isə, “Idemitsu IFG Plantech Racing” adlanan yeni bitki mənşəli mühərrik yağını təkcə ətraf mühit üçün daha yaxşı deyil, həm də yarış mühərrikləri üçün inanılmaz dərəcədə güclü seçim edir.
Ümumiyyətlə, Yaponlar texnologiya tərəfində daim yeniliklər etməyə həvəslidirlər. Belə ki, Yaponlar daha əvvəl də dəmir yollarında işləmək üçün Wall-E-dən ilhamlanaraq insanabənzər robot hazırlamışdılar. İndi isə Yaponlar “Idemitsu IFG Plantech Racing” adlanan yeni bitki mənşəli yarış mühərrik yağını hazırlamaqla yarış dünyasına innovativ ruh gətiriblər. Rəqiblər ilə müqayisədə 50% daha az sürtünmə imkanı təklif edən bu yağ daxili sınaqlarda mühərrik üçün 169% daha yaxşı qorunma və 124% daha yaxşı piston təmizliyi təmin edir. Bu yeniliyin arxasında duran şirkət İdemitsu Kosan hətta yağı real yarış şəraitində sınaqdan keçirib.
Mazda Spirit Racing Roadster CNF bu yağı peşəkar yarış seriyası olan Super Taikyu Series-də istifadə edib və 5 saatlıq sınaqdan keçirib. Qeyd edək ki, bu innovativ yarış mühərriki yağının yaradılması prosesi heyrətamizdir. Bu yağın hazırlanması üçün palma və günəbaxan yağlarından istifadə edilib. Ənənəvi mineral yağlardan 82% daha az karbon izi ilə ətraf mühit üçün də daha təhlükəsiz olan bu yağ tezliklə Tayland, Avstraliya, Sinqapur və Malayziyada onlayn şəkildə satılacaq.
